Prospektdə "07"ni soldan vurdular, sağı əzildi - Özü isə aşdı - VİDEO

Bakının 8 Noyabr prospektində baş verən ağır yol-nəqliyyat hadisəsi anbaan təhlükəsiz şəhər kameralarına qeyd olunub. Avtosfer.az xəbər verir ki, qəza yol hərəkəti qaydalarına əməl etməyən iki avtomobilin toqquşması nəticəsində baş verib.

Hadisə zamanı "VAZ 2107" markalı avtomobilin sürücüsü düz istiqamətdə hərəkət etməli olduğu zolaqdan qəfil geriyə dönməyə çalışıb. Eyni anda arxadan gələn "Cherry" markalı avtomobilin sürücüsü isə svetoforun sarı işığa keçdiyini görüb və yüksək sürətlə hərəkət etməyə başlayıb. Nəticədə, "Cherry" geriyə dönən "VAZ 2107" ilə toqquşaraq aşıb.

Toqquşma güclü olduğundan hər iki avtomobilə ciddi ziyan dəyib. Hətta zərbənin təsiri o qədər güclü olub ki, geriyə dönən avtomobil sol hissədən vurulsa da, maşının sağ hissəsi də deformasiyaya uğrayıb.

Qəza anından sonra "VAZ" markalı avtomobilin sərnişini dərhal düşərək, aşıb qalan sürücüyə kömək etməyə çalışıb. Xoşbəxtlikdən, hadisə zamanı ölüm faktı qeydə alınmayıb.

Fərid