"Apple" şirkətinin yeni rəhbəri vəzifəsinin icrasına başlayıb

51 yaşlı Con Ternus sentyabrın 1-də "Apple" şirkətinin baş direktoru vəzifəsinin icrasına rəsmi olaraq başlayıb.

Avtosfer.az-ın mk.ru-ya istinadən verdiyi xəbərə görə, o, şirkətin Direktorlar Şurasında da yerini alıb.

Con Ternus bu vəzifədə Tim Kuku əvəzləyib. Bununla belə, Tim Kuk da şirkətdə fəaliyyətini davam etdirəcək.

Qeyd edək ki, Con Ternus "Apple" şirkətindən əvvəl "Virtual Research Systems"də mexanika mühəndisi kimi çalışıb və burada virtual reallıq (VR) eynəklərinin hazırlanması ilə məşğul olub.

2001-ci ildə "Apple" heyətinə qoşulan Ternus əvvəlcə monitorların dizaynına cavabdeh olub. Daha sonra "iPad", "AirPods" və "iPhone" məhsul xətləri üzrə aparat təminatının hazırlanmasına rəhbərlik edib. 2021-ci ildə isə şirkətin icraçı komandasına daxil olub.