Telefonların bu funksiyalarından çoxları xəbərsizdir

Müasir smartfonlar onlarla müxtəlif imkanlarla təchiz olunsa da, istifadəçilərin əksəriyyəti cihazlarının yalnız kiçik bir hissəsindən istifadə edir. Texnologiya sahəsi üzrə mütəxəssislər smartfon sahiblərinin ən çox diqqətdən kənarda qoyduğu faydalı funksiyaları açıqlayıblar. Avtosfer.az Lent.az-a istinadla xəbər verir ki, ekspertlərin sözlərinə görə, ən az istifadə olunan imkanlardan biri təcili yardım rejimidir. Bu funksiya əvvəlcədən seçilmiş əlaqə nömrələrinə istifadəçinin yerləşdiyi məkan barədə məlumatla birlikdə təcili siqnal göndərməyə imkan verir. Lakin bir çox insan bu xidməti heç vaxt aktivləşdirmir. Digər az istifadə olunan xüsusiyyət isə sənədlərin daxili skan edilməsidir. Müasir smartfonlar əlavə tətbiq quraşdırmadan sənədləri avtomatik tanıya, görüntünü düzəldə və faylları PDF formatında yadda saxlaya bilir. Mütəxəssislər bildirirlər ki, istifadəçilərin əksəriyyəti rəqəmsal rifah alətlərinə də laqeyd yanaşır. Bu funksiyalar tətbiqlərdə keçirilən vaxtı izləməyə və müəyyən proqramlar üçün istifadə məhdudiyyətləri təyin etməyə imkan yaradır. Az tanınan imkanlar sırasında bir əllə idarəetmə rejimi, iki tətbiqin eyni anda istifadəsini təmin edən bölünmüş ekran funksiyası, eləcə də müəyyən şərtlər daxilində smartfonun avtomatik əmrləri yerinə yetirməsinə şərait yaradan ssenarilər də yer alıb. Bundan əlavə, bir çox istifadəçi kamera vasitəsilə mətn tərcüməsi, digər cihazların köməyi ilə itirilmiş smartfonun tapılması və uyğun avadanlıq olduqda məişət texnikasının telefon vasitəsilə idarə edilməsi kimi funksiyalardan istifadə etmir.