Ağdam-Füzuli avtomobil yolunun inşasının yekunlaşacağı tarix AÇIQLANDI

“Gələn il Ağdam-Füzuli avtomobil yolunun inşasının yekunlaşdırılması nəzərdə tutulub”.

“Report” xəbər verir ki, bunu Qarabağ iqtisadi rayonuna daxil olan işğaldan azad edilmiş ərazilərdə Prezidentin xüsusi nümayəndəsinin müavini Bəşir Hacıyev Bakıda keçirilən “Güclü iqtisadiyyat üçün Azərbaycanda peşə təhsilinin inkişaf yolu: Gələcəyə baxış” adlı konfrans çərçivəsində təşkil olunmuş “Böyük Qayıdış: Yeni iqtisadi reallıqlar və əmək bazarının dəyişən tələbləri” mövzusunda panel müzakirələrində bildirib.

Bundan başqa, o qeyd edib ki, Bərdə-Ağdam avtomobil yolunun inşası da yekunlaşmaq üzrədir.

“Artıq həmin ərazidə “Azərenerji” ASC iki yarımstansiya istifadəyə verib. Ağdamda “Böyük Qayıdışa dair I Dövlət Proqramı”na uyğun olaraq 2026-cı ilin sonuna qədər beş yaşayış məhəlləsi və 12 kənd inşa olunaraq sakinlərə təhvil veriləcək. Ağdamda tarixi-mədəni abidələr də bərpa olunur, mərkəzi və meşə parkları layihələndirilir və yaxın zamanda inşasına başlanacaq. Ağdam əvvəllər də sənaye şəhəri kimi tanınıb. İndi burada sənaye parkı var və rezidentlər zavod, fabriklərin inşasına başlayıblar. Növbəti il onların bir neçəsinin açılışı olacaq”, - deyə B.Hacıyev əlavə edib.