Qəzadan sonra ətrafa dağılan yanacaq faciəyə səbəb oldu: azı 5 ölü, 40-dan çox yaralı - VİDEO

Peruda avtosisternin iştirakı ilə baş verən qəzadan sonra faciə yaşanıb. Avtosfer.az xəbər verir ki, hadisə yanvarın 23-də səhər saatlarında paytaxta Limada qeydə alınıb. Bu barədə “Comerico” nəşri məlumat verib. Məlumata görə, yanacaq dolu avtosisterni avtomobil təmir sexinin divarına çırpılıb və ətrafa dağılan yanacaq bir müddət sonra partlayışa ardınca da güclü yanğına səbəb olub. Alov genişlənərək yaxınlıqdakı 3 yaşayış binasına da keçib.

Nəticədə 5 nəfər ölüb, 40-dan çox insan yanıq xəsarətləri alıb. Onlardan bəzilərinin vəziyyəti ağır qiymətləndirilib.

Bildirilir ki, yanğın zamanı 20-yə yaxın evə ziyan dəyib. Zədələnmiş evləri tərk etmək məcburiyyətində qalan ailələr üçün isə müvəqqəti çadırlar quraşdırılıb.

Namiq Musayev