Vahid məktəbli forması hansı prinsiplərə xidmət edir? – AÇIQLAMA

Təhsil müəssisələrində vahid geyim formasının tətbiqi və təhsilin dünyəvi prinsiplər əsasında təşkili şagirdlər arasında bərabərliyin qorunması, qarşılıqlı hörmətin gücləndirilməsi və sağlam təhsil mühitinin formalaşdırılması baxımından mühüm əhəmiyyət daşıyır.

Təhsilin dünyəviliyi və vahid məktəbli geyim formasının tətbiqi şagirdlər arasında bərabərliyin və vahid təhsil mühitinin formalaşmasına necə töhfə verir?

Mövzu ilə bağlı Nizami Gəncəvi adına Ədəbiyyat İnstitutunun elmi katibi, filologiya üzrə fəlsəfə doktoru, dosent Aygün Bağırlı Avtosfer.az-a açıqlamasında bildirib ki, orta ümumtəhsil məktəblərində vahid geyim qaydalarının qorunması daxili nizam-intizamın möhkəmlənməsinə xidmət edən addımdır:

 "Bunu bir məhdudiyyət kimi deyil, modern və müstəqil dövlət modelinin, güclü maarifçilik xəttinin göstəricisi kimi qəbul etmək lazımdır. Yetkinlik yaşına çatan hər kəs öz həyat tərzini və dünyagörüşünü sərbəst şəkildə müəyyənləşdirə bilər. Lakin məktəb həmişə toxunulmaz bir elm məbədi kimi qalmalıdır. Məktəbli partası arxasında hər hansı açıq saçıqlıq, yaxud simvol xarakteri daşıyan geyim elementlərinin istifadəsi qəbul edilmir. Vahid məktəbli forması məhz bu bərabər başlanğıcın təməli olmalı, valideynin sosial imkanlarını, dünyagörüşünü sərgiləməməlidir. Şagird zəkası, elmi marağı və fərdi istedad və bacarıqları ilə dəyər qazanmalıdır. Düşünürəm ki, həm valideynlərlə, həm şagirdlərlə bu istiqamətdə maarifləndirici söhbətlərin  aparılması labüddür".

Eltac