Prezident: Vaxtilə “şeytan yuvası” olan bina Zəfər muzeyi olacaq

Prezident İlham Əliyev 8 Noyabr – Zəfər Günü münasibətilə Xankəndi şəhərində xalqa müraciəti zamanı Zəfər muzeyinin yaradılması ilə bağlı görülən işlərdən danışıb.

Avtosfer.az xəbər verir ki, dövlət başçısı Zəfər tağının qarşısında çıxışı zamanı bildirib ki, bu, Azərbaycanın şanlı qələbəsinin şərəfinə ucaldılmış ikinci Zəfər tağıdır. Birinci Zəfər tağının Bakıda, ikincisinin isə Xankəndidə yerləşdiyini qeyd edib.

Prezident vurğulayıb ki, Bakıda Zəfər tağının yaxınlığında fəaliyyət göstərən Zəfər muzeyində şəhidlərin adları əbədiləşdirilib. Xankəndidə də belə bir muzeyin yaradılması istiqamətində son tamamlama işləri aparılır.

İlham Əliyevin sözlərinə görə, muzey keçmiş icra hakimiyyətinin binasında yerləşəcək. Dövlət başçısı həmin binanın vaxtilə Azərbaycana qarşı təcavüz və işğalçılıq siyasətinin mərkəzlərindən biri olduğunu xatırladıb.

O bildirib ki, 2023-cü ilin oktyabrında həmin binaya gəldiyi zaman ilk olaraq pəncərələri açıb və bununla da oradakı “şeytan ruhunun” çəkilib getməsini istəyib.

Prezident qeyd edib ki, vaxtilə həmin binada fəaliyyət göstərən hərbi cinayətkarlar öz layiqli cəzalarını alıblar.

Eltac Zülfüqaroğlu