Alıcılara MÜJDƏ – BYD ucuzlaşdı

Son zamanlar Azərbaycanın avtomobil bazarında, xüsusən də Çin istehsalı olan hibrid modellər arasında "BYD Destroyer 05" xüsusi diqqət çəkir. Avtomobil elanı platformalarındakı (məsələn, Turbo.az) cari elanlar göstərir ki, işlənmiş və yürüşü çox olan "Destroyer 05" modellərinin dəyərində müəyyən ucuzlaşma tendensiyası müşahidə olunur.

Avtosfer.az “Yeni Sabah”-a istinadla xəbər verir ki, elanlardakı rəqəmlərə nəzər salsaq, qiymət aralığının yürüşdən və buraxılış ilindən asılı olaraq xeyli dəyişdiyini görmək olar. Salondan yenicə çıxan və ya 0 km olan 2025–2026-cı il modelləri 28,000 – 32,200 AZN civarında təklif edildiyi halda, 30 min ilə 140 min kilometr arası yürüşü olan 2024–2025-ci il modellərinin qiyməti 21,900 – 25,500 AZN aralığına qədər geriləyib.

Bazardakı bu qiymət enişinin arxasında bir neçə əsas səbəb dayanır. Xüsusilə taksi xidmətində intensiv istifadə olunan və yüksək yürüşə malik avtomobillərin satışa çıxarılması orta bazar qiymətini aşağı çəkir. Bununla yanaşı, ölkəyə mütəmadi olaraq yeni "BYD" modellərinin gətirilməsi rəqabəti artırır. Həmçinin 2,500–3,500 AZN ilkin ödənişlə təklif olunan əlverişli kredit və lizinq şərtləri alıcıların birbaşa yeni avtomobillərə yönəlməsinə, bu da ikinci əl seqmentdə qiymətlərin tənzimlənməsinə şərait yaradır. 

"BYD Destroyer 05" modeli Bakı və ətraf ərazilərdə ən geniş yayılmış taksi vasitələrindən birinə çevrilib. Hibrid (PHEV) sistemi sayəsində şəhəriçi sürüşdə minimum yanacaq sərf etməsi sürücülər üçün böyük xərc qənaəti deməkdir. Eyni zamanda avtomobilin texniki göstəricilərinin taksi buraxılış kartı tələblərinə tam cavab verməsi modelə olan kommersiya marağını yüksək səviyyədə saxlayır.

Yürüşü çox olan maşınların qiymətində ucuzlaşma qeydə alınsa da, "BYD Destroyer 05"ə olan ümumi tələbat azalmayıb. Həm şəxsi istifadə, həm də sərnişindaşıma fəaliyyəti üçün geniş alıcı kütləsinə malik olması maşının bazarda tez satılmasını (likvidliyini) təmin edir. Ekspertlərin fikrincə, qiymətlərin optimal həddə düşməsi bu modelin populyarlığını qorumağa kömək edəcək.