“Vəziyyət çox pisdir...” - “Sədərək”də alver azalır - VİDEO

Son günlər sosial şəbəkələrdə Sədərək və Binə ticarət mərkəzlərinin bağlanacağı ilə bağlı yayılan iddialar geniş müzakirələrə səbəb olub. İddialara görə onlayn ticarətin sürətlə inkişaf etməsi ənənəvi bazarlara marağı azaldıb.

Avtosfer.az-ın məlumatına görə, ATV-yə danışan satıcılar deyir ki, onlayn ticarətin geniş yayılmasından sonra alıcı sayı və satış həcmi əhəmiyyətli dərəcədə azalıb.

Satıcılardan biri qeyd edib ki, onlayn satışlardan sonra alver 0-a yaxınlaşıb, “Sədərək” bazarı tam boş qalıb. 

Digər xanım satıcı isə bildirib ki, hər kəs məhsulu sifarişlə aldığı üçün “Sədərəy”ə çox az adam gəlir, vəziyyət isə çox pisdir.

Bazara üz tutan alıcılar arasında isə əsasən orta və yuxarı yaş qrupuna aid insanlar üstünlük təşkil edir. Onların bir qismi onlayn alış-verişin daha sərfəli olduğunu desə də, digərləri məhsulun ölçüsü, keyfiyyəti və geri qaytarılma prosesində yaşanan çətinliklərə görə ənənəvi alışverişə üstünlük verdiklərini bildirirlər.

İqtisadçı Xalid Kərimlinin sözlərinə görə, onlayn ticarətin sürətlə inkişaf etməsinin əsas səbəblərindən biri də vergi güzəştləridir: “Onlayn ticarət ənənəvi ticarətə problem yaradır. Bu, xüsusən də vergi məsələsidir. Hökumət vətəndaşa humanist yanaşaraq aylıq 300 dollarlıq şəxsi istehlak üçün etdiyi idxalı bütün vergi və rüsumlardan azad edir. Təbii ki, ənənəvi ticarətə müəyyən problemlər yaradacaq, amma rəqabətin genişliyi müxtəlif kanallar arasında rəqabət aparılması ümumi dövlətin və vətəndaşın xeyrinə olan məsələdir”. 

Sədərək Ticarət Mərkəzinin mətbuat katibi Kəmaləddin Qədimi bildirib ki, ticarət mərkəzinin bağlanacağı ilə bağlı yayılan məlumatlar həqiqəti əks etdirmir. Onun sözlərinə görə, “Sədərək” fəaliyyətini normal qaydada davam etdirir və bağlanması ilə bağlı hər hansı bir məsələ gündəmdə deyil. 

Daha ətraflı videomaterialda: