Bağ avadanlıqları adıyla ölkəyə lüks avtomobillər gətirildi - 17 milyon manatlıq qaçaqmal - FOTO

Türkiyənin Mersin vilayətində gömrük əməkdaşları ölkə tarixində bəlkə də ən qeyri-adi qaçaqmalçılıq hadisələrindən birini aşkar ediblər.

Avtosfer.az xəbər verir ki, Mersin Gömrük Mühafizəsi Qaçaqmalçılıq və Kəşfiyyat Müdirliyinin keçirdiyi əməliyyat zamanı içərisində bağçılıq və tekstil materiallarının olduğu bildirilən konteynerlərdən lüks avtomobillər çıxıb.

Gömrük əməkdaşlarının apardığı araşdırma nəticəsində 12 konteynerdə şübhəli sıxlıq müəyyən edilib. Risk analizindən sonra konteynerlər açılıb və içərisində Ferrari də daxil olmaqla müxtəlif marka və modellərdə 24 lüks avtomobil və cip aşkarlanıb.

Ticarət Nazirliyinin açıqlamasına görə, aşkarlanan nəqliyyat vasitələrinin ümumi dəyəri təxminən 357 milyon lirə (17 milyon azn) təşkil edir. Avtomobillərin oğurlanması ilə bağlı hansısa şikayət daxil olmadığı üçün dövlət tərəfindən nəqliyyat vasitələri müsadirə edilib.

Hazırda avtomobillərin oğurluq və ya itkin olması ilə bağlı araşdırmalar aparılır.

Eltac Zülfüqaroğlu