Keçmiş icra başçısının oğlunu öldürən şəxs azadlığa çıxmaq istəyir

Şəmkir Rayon İcra Hakimiyyətinin keçmiş icra başçısı Aslan Aslanovun oğlu Ruslan Aslanovun qətlində təqsirləndirilən Vüqar Əliyev vaxtından əvvəl azadlığa çıxmaq üçün məhkəməyə müraciət edib.

Avtosfer.az “Report”a istinadən xəbər verir ki, Qaradağ rayon Məhkəməsində Vüqar Əliyevin ərizəsinə baxılıb.

Məhkəmə iş üzrə qərar qəbul edib və V.Əliyevin ərizəsi təmin edilməyib.

Qərardan narazı qalan Vüqar Əliyev apellyasiya şikayəti verib.

Şikayət Bakı Apellyasiya Məhkəməsində hakim Faiq Qəniyevin icraatına verilib.

Qeyd edək ki, 2003-cü ildə Şəmkirdə Vüqar Əliyev nişanlısı Lamiyə Quliyeva ilə birlikdə həmin vaxtı rayonun icra başçısı olan Aslan Aslanovun oğlu Ruslan Aslanovun öldürülməsində təqsirli bilinib.

Məhkəmənin hökmü ilə Vüqar Əliyev ömürlük, Lamiyə Quliyeva isə 10 il müddətinə azadlıqdan məhrum edilib.

2021-ci ildə Prezident İlham Əliyevin əfv sərəncamı ilə Vüqar Əliyevin cəzası ömürlükdən 25 il azadlıqdan məhrum etmə ilə əvəzlənib.

Vüqar Əliyevin hazırda 3 il çəkilməmiş cəzası qalıb.