Avtomobil idarə edən sürücünün diqqəti hansı səbəblərdən pozulur? – MÜTƏXƏSSİS AÇIQLADI - VİDEO

Sükan arxasında diqqətin yayınmasının əsas səbəblərindən biri psixoloji gərginlik və gündəlik problemlərdir.

Avtosfer.az xəbər verir ki, bu barədə “Avto FM”in efirində qəza əleyhinə kursların məşqçisi Aqil Rəhimov danışıb. O bildirib ki, insanların sükan arxasında fikirli olması həyatın təbii axarı ilə bağlıdır, çünki hər kəs gündəlik problemlərlə üzləşir.

Heç bir cəmiyyət və ya dövr problemsiz olmayıb. Lakin əsas məsələ həmin problemlərin sükan arxasında sürücünün diqqətinə necə təsir etməsidir. Aqil Rəhimov sürücülərə mühüm tövsiyə verərək bildirib ki, avtomobilə əyləşdikdən sonra A nöqtəsindən B nöqtəsinə çatana qədər şəxsi problemləri mümkün qədər kənara qoymaq lazımdır.

Sürücü yol boyu problemlər haqqında düşündükdə diqqəti yayınır, bu isə yol hərəkəti qaydalarının pozulmasına, cərimələrə və daha ciddi nəticələrə səbəb ola bilər. Diqqətsiz sürücülük daha ağır yol-nəqliyyat hadisələrinə gətirib çıxara bilər və bu zaman əvvəl düşündüyü problem daha kiçik görünə bilər.

Aqil Rəhimov əlavə edib ki, sürücülər sükan arxasında əsas diqqəti yola yönəltməli, təhlükəsiz şəkildə mənzil başına çatmağı prioritet hesab etməlidirlər. Onun sözlərinə görə, şəxsi məsələlər barədə düşünmək üçün daha uyğun vaxt və şərait seçilməlidir.

Düzgün psixoloji yanaşma və diqqətli sürücülük həm şəxsi təhlükəsizliyi təmin edir, həm də yollarda ümumi riskləri azaldır.

Eltac Zülfüqaroğlu