Biləcəri dairəsində nəqliyyat sıxlığı necə azaldıla bilər? – TƏKLİF

Biləcəri dairəsində nəqliyyat sıxlığının azaldılması və hərəkət axınlarının daha səmərəli təşkili üçün yeni infrastruktur həllərindən istifadə oluna bilər.

Avtosfer.az xəbər verir ki, nəqliyyat eksperti Rauf Ağamirzəyev dairəvi yolda geriyə dönmənin təşkili üçün iki estakadanın inşa edilməsinin Biləcəri dairəsində nəqliyyat axınlarının ayrılmasına və dairənin üzərindəki yükün azalmasına imkan verə biləcəyini bildirib.

Bu həll xüsusilə Bakı Beynəlxalq Avtovağzal Kompleksinə daxil olan və oradan çıxan regional avtobuslar üçün əhəmiyyətlidir. Belə ki, avtobusların şəhər daxilində əlavə tıxaclara düşmədən daha qısa marşrutla Avtovağzala daxil olub-çıxması təmin edilə bilər.

Rauf Ağamirzəyev qeyd edib ki, düzgün təşkil olunacağı təqdirdə, belə bir infrastruktur həlli Yeni Yasamal istiqamətində nəqliyyat əlçatanlığının artırılmasına və Biləcəri dairəsində qarışıq hərəkət manevrlərinin azalmasına da kömək edə bilər.

“Burada əsas məsələ sadəcə yeni yol tikmək deyil. Mövcud yol şəbəkəsində hərəkət axınlarını necə daha səmərəli bölə bilərik? Məncə, layihələndirmə mərhələsində bu variant mütləq nəqliyyat modelləşdirilməsi ilə qiymətləndirilməlidir”, - deyə ekspert vurğulayıb.

Ekspertin fikrincə, mümkün layihənin həyata keçirilməsindən əvvəl nəqliyyat axınlarının intensivliyi, pik saatlarda yaranan sıxlıq, avtobusların hərəkət istiqamətləri və ətraf ərazilərə təsiri nəzərə alınaraq modelləşdirmə aparılması məqsədəuyğundur.

Eltac Zülfüqaroğlu