Bir neçə zolağın eyni anda dəyişdirilməsi qəza riskini artırır – MÜTƏXƏSSİS – VİDEO

Sürücülərin yol verdiyi ən təhlükəli manevrlərdən biri bir neçə hərəkət zolağını eyni anda dəyişməkdir. Bu cür davranış qəza riskini artırmaqla yanaşı, digər hərəkət iştirakçıları üçün də gözlənilməz vəziyyət yaradır.

Avtosfer.az xəbər verir ki, qəza əleyhinə kursların məşqçisi Aqil Rəhimov zolaq dəyişmə zamanı sürücülərin daha ehtiyatlı davranmasının vacibliyini vurğulayıb.

Onun sözlərinə görə, zolaqların mərhələli şəkildə dəyişdirilməsi daha təhlükəsiz hesab olunur.

“Ən təhlükəsiz üsul zolaqları tədricən dəyişməkdir. Məsələn, sürücü ikinci zolaqda hərəkət edirsə, əvvəlcə yan güzgülərə və kor nöqtələrə nəzarət etməli, hərəkət üçün təhlükəsiz şərait yarandıqdan sonra bir zolaq dəyişməlidir. Daha sonra yenidən vəziyyəti qiymətləndirərək növbəti zolağa keçə bilər. Bu üsul sürücüyə ətrafdakı nəqliyyat vasitələrini daha yaxşı müşahidə etməyə və riskləri minimuma endirməyə imkan verir”, – deyə Aqil Rəhimov bildirib.

Bəzi sürücülərin isə bir neçə zolağı eyni anda kəskin şəkildə dəyişdiyini qeyd edib. Onun sözlərinə görə, bu cür manevrlər xüsusilə sıx nəqliyyat axını zamanı ciddi yol-nəqliyyat hadisələrinə səbəb ola bilər.

“Bir çox hallarda sürücülər güzgüyə qısa baxışla kifayətlənərək bir neçə zolağı birdən kəsməyə çalışırlar. Belə manevr zamanı digər nəqliyyat vasitələrinin sürəti və mövqeyi düzgün qiymətləndirilmədikdə toqquşma riski yaranır. Xüsusilə yüksək sürətlə hərəkət zamanı bu davranış ağır nəticələrə səbəb ola bilər”, – deyə o vurğulayıb.

Aqil Rəhimov sürücülərə zolaq dəyişərkən tələsməməyi, dönmə işıqlarından istifadə etməyi, güzgülərə və kor nöqtələrə diqqət yetirməyi tövsiyə edib. Təhlükəsiz sürücülük vərdişləri yol hərəkətinin bütün iştirakçılarının təhlükəsizliyinin təmin olunmasında mühüm rol oynayır.

Eltac Zülfüqaroğlu