Bu küçədə yaşıl işıq yanan kimi tələsməyin: Qəza riski var – VİDEO

Paytaxtın Nərimanov rayonunda, Təbriz küçəsində yerləşən geriyə dönmə yerində sürücülərin səbirsiz davranışı qəza riskini artırır. İşıqforun yaşıl işığı yanan kimi hərəkətə başlayan sürücülər yolayrıcında hərəkətini hələ başa çatdırmamış avtomobillərə yol vermədikdə təhlükəli vəziyyət yaranır.

Avtosfer.az xəbər verir ki, bu barədə qəza əleyhinə kursların məşqçisi Aqil Rəhimov bildirib.

Onun sözlərinə görə, bəzi sürücülər yaşıl işıq yanan kimi tələskənlik edərək digər avtomobillərin hərəkətini başa çatdırmasını gözləmirlər. Nəticədə yolayrıcını tərk etməyə macal tapmayan nəqliyyat vasitələri ilə toqquşma riski yaranır.

Aqil Rəhimov qeyd edib ki, sürücülər işıqforun siqnallarına əməl etməklə yanaşı, yolayrıcındakı vəziyyəti də düzgün qiymətləndirməlidirlər. Yaşıl işıq yansa belə, hərəkətini başa çatdırmamış avtomobillərin yolunu kəsmək olmaz. Sürücülər təhlükəsiz şərait yarandıqdan sonra hərəkəti davam etdirməlidirlər.

Məşqçi vurğulayıb ki, yolda tələskənlik və səbirsizlik ağır nəticələrə səbəb ola bilər. Buna görə də sürücülər xüsusilə yolayrıclarında diqqətli olmalı, digər hərəkət iştirakçılarının manevrlərini nəzərə almalı və qəza riskini artıran davranışlardan çəkinməlidirlər.

Eltac Zülfüqaroğlu