Bu nişanı səhv başa düşən sürücülər cərimələnə bilər – XƏBƏRDARLIQ - VİDEO

Sürücülərin yol hərəkəti zamanı diqqət etməli olduğu məqamlardan biri də zolaqlar üzrə hərəkət istiqamətini göstərən nişanlarla məcburi hərəkət istiqaməti nişanlarının fərqləndirilməsidir. Bu nişanların səhv başa düşülməsi sürücülərin yolayrıcında düzgün olmayan manevr etməsinə səbəb ola bilər.

Avtosfer.az xəbər verir ki, qəza əleyhinə sürücülük kurslarının baş məşqçisi Aqil Rəhimov Bakı şəhərində, Mətbuat prospektində çəkdiyi videoda sözügedən nişanların fərqini izah edib və sürücülər üçün vacib məqama diqqət çəkib.

Ekspert bildirib ki, sürücülər bəzən 5.8.1 “Zolaqlar üzrə hərəkət istiqamətləri” nişanı ilə 4.1.1 “Düzünə hərəkət” nişanını səhv salırlar.

Aqil Rəhimovun sözlərinə görə, 5.8.1 nişanı konkret olaraq yolun zolaqları üzrə hərəkət istiqamətini göstərir. Əgər sol zolaqda ayrıca beton ayırıcı və ya digər fiziki sədd varsa və həmin zolaqdan sola hərəkətə icazə verən istiqamət göstərilibsə, sürücü həmin zolaqdan sola dönə bilər.

Lakin 4.1.1 kimi məcburi hərəkət istiqamətini göstərən nişan tətbiq olunursa, vəziyyət fərqlidir. Bu halda nişanın tələbi əsas götürülür və fiziki ayırıcı olsa belə, nişanın icazə vermədiyi istiqamətdə hərəkət etmək olmaz.

Mütəxəssis həmçinin bildirib ki, yaxın vaxtlarda taksidə olarkən sürücünün sola dönmək istədiyini görüb və ona nişanın yalnız müəyyən bir zolağa deyil, yolayrıcında hərəkət qaydasına aid olduğunu izah edib.

Aqil Rəhimov sürücülərə yol nişanlarının formasına və təyinatına diqqət yetirməyi, xüsusilə də zolaqlar üzrə hərəkət istiqamətini göstərən nişanlarla məcburi hərəkət istiqaməti nişanlarını bir-birindən fərqləndirməyi tövsiyə edib.

Eltac Zülfüqaroğlu