Kondisioner istifadə etmədən maşınınızın salonunu bu üsulla soyuda bilərsiniz – ARAŞDIRMA

Yay aylarında güclü istidən avtomobillərin içi sobaya çevrilir. Belə hava şəraitində sürücülərin avtomobilə minərkən ilk etdikləri iş kondisioneri işə salmaq olur.

Avtosfer.az xəbər verir ki, britaniyalı alim, doktor Hannah Fry avtomobildən isti havanı qısa müddətdə çıxarmağın effektiv və qənaətcil üsulunu təqdim edib. Onun maye dinamikası prinsiplərinə əsaslanan bu metodu xüsusilə “TikTok” və “Instagram” platformalarında böyük maraqla qarşılanıb.

Doktor Fry-nin izah etdiyi texnika avtomobilin daxili temperaturunu cəmi bir neçə dəqiqə ərzində 5-10 dərəcə aşağı sala bilir. Metodu tətbiq etmək üçün aşağıdakı addımları yerinə yetirmək kifayətdir:

Sürücünün arxasında yerləşən pəncərəni tam açın.

Daha sonra sürücünün qapısını bir neçə dəfə tez açıb bağlayın.

Bu hərəkət avtomobilin içindəki isti havanın xaric olunmasına və aşağı təzyiqli sahənin yaranmasına səbəb olur. Nəticədə kondisioneri işə salmazdan əvvəl salon müəyyən qədər soyumuş olur.

Yalnız kondisionerdən deyil, digər sadə üsullardan da istifadə etməklə avtomobili sərin saxlamaq və yanacağa qənaət etmək mümkündür:

Avtomobili günəş altında deyil, mümkün qədər kölgədə saxlayın.

Ön şüşəyə yerləşdirilən əks etdirici qoruyucular daxili temperaturun artmasının qarşısını alır.

Günəşdə isinə biləcək oturacaqları qoruyucu örtüklərlə örtmək daha komfortlu sərinlik təmin edir.

İsti hava şəraitində təkərlərdəki hava genişlənə bilər ki, bu da təhlükəli partlamalara səbəb ola bilər. Mütləq şəkildə təkər təzyiqinin normaya uyğunluğunu yoxlamaq lazımdır.

Eltac Zülfüqaroğlu