Maşından düşmək istəyərkən bu qaydalara əməl edin - VİDEO

Qəza əleyhinə kursların məşqçisi Aqil Rəhimov sürücülərə və avtomobildən düşən yolçulara qapıların açılma qaydası barədə vacib tövsiyələr verib.

Avtosfer.az xəbər verir ki, məşqçi Aqil Rəhimov xüsusən şəhər küçələrində və sıx məskunlaşmış ərazilərdə avtomobil qapılarının ehtiyatsız açılması hallarının tez-tez ağır nəticələrə gətirib çıxardığını bildirib.

“Avto FM” radiosunun efirində danışan məşqçi qeyd edib ki, bəzən sürücülər avtomobili yol kənarına yaxın saxlayır, qapı ilə digər nəqliyyat vasitəsi arasında cəmi yarım–bir metr aralıq qalır:

"Bu halda qapı qəflətən açılarsa, arxadan gələn avtomobil əksər hallarda sərnişini görə bilmir və toqquşma qaçılmaz olur. Nəticədə həm piyada, həm də sürücü üçün ciddi xəsarət riski yaranır.

Aqil Rəhimovun tövsiyəsi belədir: qapını bir anda tam açmaq olmaz — əvvəlcə qapını azca (təxminən 10 sm) açıb güzgüyə və ətrafda yolun vəziyyətinə baxın, yalnız təhlükəsizlik təmin olunduqdan sonra qapını tam açın. Belə hərəkət sürücünü və piyadanı qəfil zərbədən qoruyur və yolda baş verə biləcək fəsadların qarşısını alır".

O vurğulayıb ki, bu sadə vərdişə çevrilsə, qəza hallarının sayı xeyli azalacaq: “Bir balaca açırsan, güzgüyə baxırsan, sonra tam açırsan — bu, vərdişə çevrilməlidir.”

Məşqçi həmçinin diqqətə çatdırıb ki, dar küçələrdə və sıx hərəkətdə qapı açarkən daha da ehtiyatlı olmaq lazımdır, çünki qəfil açılan qapı həm ön, həm də arxa avtomobillərə zərbə vura və zəncirvari qəzalara səbəb ola bilər. Sürücülərə və sərnişinlərə yol hərəkəti qaydalarına riayət etməyi və təhlükəsizliyi prioritet tutmağı tövsiyə edib.

Eltac Zülfüqaroğlu