Maşını işə saldıqdan sonra gözləmək niyə mütləqdir? - VİDEO

Avtomobil mühərrikinin sağlam və uzunömürlü fəaliyyəti üçün sürücülərin nəzərə almalı olduğu vacib vərdişlərdən biri də mühərriki işə salmazdan əvvəl kontakta bir qədər gözləməkdir.

Avtosfer.az xəbər verir ki, mütəxəssislər mühərriki işə salmadan öncə kontakta keçid verərək təxminən 20-30 saniyə gözləməyi tövsiyə edirlər. Bu zaman ərzində yanacaq nasosu sistemin tam şəkildə təzyiqlə doldurulmasına şərait yaradır, həmçinin mühərrik yağı vacib nöqtələrə çatır. Bu proses, xüsusilə soyuq hava şəraitində mühərrik daxilindəki sürtünməni azaldır və ilk işə salma zamanı yarana biləcək aşınmaların qarşısını alır.

Avtomobil sahiblərinin bu mərhələni keçməsi, mühərrikin daxili hissələrinin qorunmasına, yağlanmanın vaxtında təmin olunmasına və ümumi mexanizmin ömrünün uzadılmasına xidmət edir.

Avtomobil ustalarının fikrincə, bu sadə və çox vaxt unudulan addım, mühərrikin uzun müddət problemsiz işləməsi üçün əhəmiyyətlidir. Xüsusən qış aylarında bu qaydaya əməl edilmədikdə, mühərrikdə əlavə nasazlıqlar və təmir ehtiyacları meydana çıxa bilər.

Sürücülərə tövsiyə olunur ki, avtomobili işə salmazdan əvvəl mühərrik sisteminin hazır vəziyyətə gəlməsi üçün mütləq bir neçə saniyə gözləsinlər və bu vərdişi gündəlik sürücülük rutininə çevirsinlər.

Eltac Zülfüqaroğlu