Nömrə nişanlarının rəng və hərflərinə görə necə fərqləndiyini bilirdiz? - ARAŞDIRMA

Azərbaycanda nəqliyyat vasitələri üçün verilən qeydiyyat nişanları təkcə identifikasiya vasitəsi deyil, həm də avtomobilin statusu və istifadə sahəsi barədə məlumat verir.

Avtosfer.az xəbər verir ki, ölkədə istifadə olunan rəsmi nömrə nişanlarının rəngləri və formatı onların hansı kateqoriyaya aid olduğunu müəyyənləşdirmək üçün xüsusi əhəmiyyət daşıyır.

Mütəxəssislərin sözlərinə görə, ən geniş yayılmış nömrə nişanları ağ fonda qara simvollardan ibarət olan standart mülki avtomobil nömrələridir. Bu nömrələr fərdi və hüquqi şəxslərə məxsus nəqliyyat vasitələrində istifadə olunur.

Sarı fon üzərində qara simvollarla yazılan nömrə nişanları əsasən xarici vətəndaşlara məxsus avtomobillər üçün nəzərdə tutulub. Bu cür nömrə nişanlarının bir neçə forması mövcuddur. Məsələn, nişanın ilk hərfi “H”, “M”, “P” və “FK” olaraq dəyişir və hər birinin fərqi var:

M — avtomobil xarici şirkətin nümayəndəliyinin əməkdaşına aiddir;

H — avtomobil xarici vətəndaşa aiddir;

P — avtomobil ölkədən ixrac üçün nəzərdə tutulmuşdur.

Fəxri konsulluqların nəqliyyat vasitələrinə "FK" seriyası üzrə dövlət qeydiyyat nişanı verilir.

Ağ fonda qara simvollardan istifadə olunur. İki hərf və defis istifadə olunmadan yazılmış 3 rəqəmdən ibarətdir.

Sol tərəfdə ensiz yaşıl zolaq yerləşir. Bu zolaqla kəsr formalı "AZ" (surətdə) və "TR" (məxrəcdə) kodları qeyd olunub. Xırda şriftlərlə sağ küncdə qeyd olunan rəqəmlər isə avtomobil aid olduğu regionun kodunu bildirir.

Qırmızı fon üzərində ağ simvollarla olan nömrə nişanları diplomatik və konsulluq nümayəndəliklərinə məxsus nəqliyyat vasitələrində istifadə olunur. Bu nömrələr xüsusi status daşıyır və beynəlxalq konvensiyalarla qorunur.

Bundan əlavə, xüsusi seriyalı və fərqləndirici nişanlar da mövcuddur ki, bunlar müəyyən dövlət orqanlarına, yüksək vəzifəli şəxslərə və ya xüsusi xidmət avtomobillərinə verilir.

Ekspertlər qeyd edirlər ki, nömrə nişanlarının bu cür rəng və format fərqləri həm yol hərəkətinin tənzimlənməsi, həm də hüquq-mühafizə orqanlarının işinin asanlaşdırılması baxımından vacib rol oynayır.

Beləliklə, avtomobillərin üzərindəki nömrə nişanları yalnız qeydiyyat vasitəsi deyil, eyni zamanda onların təyinatı və statusu haqqında mühüm məlumat verən sistemli bir identifikasiya elementidir.

Eltac Zülfüqaroğlu