Normal sürətlə hərəkət edərkən orta zolağı tutmaq daha təhlükəsizdir – Mütəxəssisdən TÖVSİYƏ - VİDEO

Qəza əleyhinə kursların məşqçisi Aqil Rəhimov sürücülərə yol hərəkəti zamanı zolaq seçiminin vacibliyi ilə bağlı xəbərdarlıq edib.

Avtosfer.az xəbər verir ki, mütəxəssisin sözlərinə görə, intensiv hərəkət olan ərazilərdə sol zolaqda hərəkət ciddi risklər yarada bilər.

O bildirib ki, Fətəli xan Xoyski küçəsi kimi yollarda qarşı zolağa qəfil çıxmalar mümkündür. Bu halda sürücü sol zolaqda olarsa, qarşıdan gələn nəqliyyat vasitəsi ilə toqquşma riski artır. Eyni zamanda, solda dayanmış avtomobillərin arxasından piyadaların qəfil çıxması ehtimalı da yüksəkdir və bu, yol-nəqliyyat hadisəsinə səbəb ola bilər.

Aqil Rəhimovun sözlərinə görə, normal sürət rejimində hərəkət edən sürücülər üçün yolun sağ hissəsi boş olduqda sağ zolaq daha uyğundur. Yolun sağ tərəfində bordürlər, ağaclar, dayanmış avtomobillər və digər maneələr varsa, orta zolaq daha təhlükəsiz seçim hesab olunur.

Məşqçi qeyd edib ki, avtobus zolağı olan yollarda da ən təhlükəsiz hərəkət zolağı orta zolaqdır. Onun fikrincə, sol zolaq risk baxımından ən təhlükəli zolaq sayılır və yol-nəqliyyat hadisələrinin böyük əksəriyyəti məhz bu zolaqda baş verir.

“Üç zolaqlı yollarda normal sürətlə hərəkət edirsinizsə, ən təhlükəsiz seçim orta zolaqdır. Sürücülər bunu nəzərə almalı və öz təhlükəsizliklərini qorumalıdırlar”, – deyə Aqil Rəhimov vurğulayıb.

Eltac Zülfüqaroğlu