Piyada vurulmalarının qarşısını almaq üçün bu təcrübə tətbiq olunmalıdır – TƏKLİF – VİDEO

Piyadaların yol hərəkətində təhlükəsizliyinin təmin olunması üçün həm sürücülərin, həm də piyadaların məsuliyyətinin artırılması vacibdir. Bu istiqamətdə maarifləndirmə tədbirləri ilə yanaşı, beynəlxalq təcrübənin də tətbiqi mühüm rol oynaya bilər.

Avtosfer.az xəbər verir ki, bu fikirləri qəza əleyhinə sürücülük kurslarının məşqçisi Aqil Rəhimov "Avto FM" radiosunun efirində səsləndirib.

Onun sözlərinə görə, piyadaların hərəkət təhlükəsizliyi yalnız piyada keçidlərinin mövcudluğu ilə məhdudlaşmır. Yol hərəkətinin bütün iştirakçıları qarşılıqlı hörmət və məsuliyyət prinsiplərinə əməl etməli, həm sürücülər, həm də piyadalar təhlükəsizlik qaydalarına ciddi riayət etməlidirlər.

Avropanın bir sıra ölkələrində, xüsusilə Almaniyada piyadaların təhlükəsizliyi ilə bağlı uğurlu təcrübələr mövcuddur. Bu ölkələrdə piyada vurulması ilə nəticələnən hadisələr ciddi şəkildə araşdırılır, məsuliyyət mexanizmləri daha dəqiq tətbiq edilir və nəzarət sistemləri müasir texnologiyalar əsasında qurulur.

Aqil Rəhimov qeyd edib ki, yol hərəkəti iştirakçılarının maarifləndirilməsi məqsədilə elektron vəsaitlərin, təlim materiallarının və rəqəmsal platformaların hazırlanması da faydalı ola bilər. Təhlükəsizlik mədəniyyətinin formalaşdırılması üçün maarifləndirmə işləri davamlı xarakter daşımalıdır.

Mütəxəssis vurğulayıb ki, piyadaların təhlükəsizliyinin təmin edilməsi üçün piyada keçidlərindən düzgün istifadə, sürücülərin sürət həddinə riayət etməsi, nəzarət mexanizmlərinin gücləndirilməsi və beynəlxalq təcrübənin öyrənilərək tətbiqi mühüm əhəmiyyət kəsb edir. Bu istiqamətdə kompleks yanaşma yol-nəqliyyat hadisələrinin sayının azalmasına müsbət təsir göstərə bilər.

Eltac Zülfüqaroğlu