Qəzaların azalması üçün maraqlı təklif: Radarlar gizlədilsin - VİDEO

Qəza əleyhinə sürücülük kurslarının məşqçisi Aqil Rəhimov stasionar radarların yerləşdiyi məntəqələr barədə əvvəlcədən xəbərdarlıq edən nişanların məqsədəuyğun olmadığını düşünür.

Avtosfer.az xəbər verir ki, o, bu fikirləri "Avto FM" radiosunun efirində səsləndirib.

Aqil Rəhimov bildirib ki, radarların sayının artırılmasının tərəfdarıdır. Lakin onun fikrincə, radarların yerləşdiyi yerləri göstərən xəbərdarlıq nişanları sürücülərin davranışına mənfi təsir göstərir.

"Radar olan yerdə sürücülər sürəti azaldır, qaydalara əməl edirlər. Radar zonasını keçən kimi isə yenidən sürəti artırırlar. Bu isə təhlükəsiz sürücülük vərdişinin formalaşmasına xidmət etmir", – deyə o vurğulayıb.

Mütəxəssis bunu oğruların siqnalizasiya olmayan evi seçməsinə bənzədərək qeyd edib ki, yol hərəkəti qaydalarını kobud şəkildə pozan sürücülər də digər hərəkət iştirakçılarının təhlükəsizliyini təhlükə altına atırlar.

Onun sözlərinə görə, radarların yerləşdiyi məntəqələrin əvvəlcədən bilinməməsi sürücüləri hər zaman qaydalara əməl etməyə sövq edər.

"Radarlar daha çox olsun, amma sürücü əvvəlcədən harada radar olduğunu bilməsin. O zaman hər an nəzarətin ola biləcəyini düşünəcək və daim yol hərəkəti qaydalarına əməl edəcək", – deyə Aqil Rəhimov bildirib.

Ölkədə yol hərəkətinə nəzarət ümumilikdə kifayət qədərdir. Bununla belə, radarlarla bağlı bu yanaşmanın tətbiq olunması sürücülərin məsuliyyətini daha da artırar və nəticədə qayda pozuntularının, eləcə də cərimələrin sayının azalmasına müsbət təsir göstərə bilər.

Eltac Zülfüqaroğlu