Sarı-ağ "zebra"lar təhlükəsizliyi artırır? – ARAŞDIRMA

Ağ və sarı rənglərlə çəkilən kontrast piyada keçidləri daha nəzərəçarpan görünsə də, bu, onların avtomatik olaraq daha təhlükəsiz olması anlamına gəlmir. Avtosfer.az xəbər verir ki, bu fikirləri nəqliyyat eksperti Anar Əliyev bildirib.

Ekspertin sözlərinə görə, bir sıra ölkələrdə, o cümlədən Rusiyanın paytaxtı Moskvada vaxtilə geniş tətbiq edilən ağ-sarı piyada keçidlərindən son illərdə tədricən imtina olunur. Bunun əsas səbəbi isə təhlükəsizliyin keçidin rəngindən deyil, yolun düzgün layihələndirilməsindən asılı olmasıdır.

Əsas məqsəd sürücünün yol nişanlanmasını deyil, piyada keçidindən istifadə edən insanı vaxtında görməsini təmin etməkdir. Yol hərəkəti təhlükəsizliyini artıran əsas amillər gecə saatlarında piyada keçidlərinin keyfiyyətli işıqlandırılması, əlavə işıqlandırma sistemlərinin quraşdırılması, enli küçələrdə təhlükəsizlik adacıqlarının yaradılması, nəqliyyat axınının intensiv olduğu yerlərdə işıqforların tətbiqi, eləcə də qaldırılmış piyada keçidləri və digər sürət azaldıcı mühəndis həllərinin həyata keçirilməsidir.

Ekspert vurğulayıb ki, yol hərəkəti təhlükəsizliyi yüksək olan şəhərlərin əksəriyyətində adi ağ rəngli piyada keçidlərindən istifadə olunur. Çünki beynəlxalq təcrübə göstərir ki, piyadaların təhlükəsizliyini təmin edən əsas amil nişanlanmanın rəngi deyil, küçələrin təhlükəsizlik prinsiplərinə uyğun layihələndirilməsi və nəqliyyatın sürətinin effektiv şəkildə idarə edilməsidir.

Anar Əliyevin fikrincə, Azərbaycanda da piyada keçidlərinin təhlükəsizliyini artırmaq üçün diqqət daha çox işıqlandırma, sürətə nəzarət, təhlükəsizlik adacıqları və müasir yol mühəndisliyi həllərinin tətbiqinə yönəldilməlidir. Bu yanaşma həm piyadaların, həm də sürücülərin təhlükəsizliyinə daha effektiv töhfə verə bilər.

Eltac Zülfüqaroğlu