Sol zolaqda gedən avtomobili sağdan keçmək olarmı? – İZAH - VİDEO

Sürücülər arasında tez-tez müzakirə olunan məsələlərdən biri də sol zolaqla hərəkət edən avtomobilləri sağ tərəfdən geridə qoymağın “sağdan ötmə” hesab edilib-edilməməsidir.

Avtosfer.az xəbər verir ki, qəza əleyhinə sürücülük kurslarının məşqçisi Aqil Rəhimov bu məsələyə aydınlıq gətirib. Onun sözlərinə görə, sürücü hərəkət etdiyi zolağı dəyişmədən digər avtomobili geridə qoyursa, bu, ötmə hesab edilmir.

“Bəzən sol zolaqlarda avtomobillər hərəkət edir, sağ zolaq isə boş olur. Biz də öz zolağımızla hərəkət edərək soldakı avtomobilləri geridə qoyuruq. Bu, sağdan ötmə sayılırmı? Xeyr.

Ötmə zamanı sürücü zolağını dəyişərək bir və ya bir neçə avtomobili geridə qoyur. Əgər biz zolağı dəyişməmişiksə, bu manevrə görə “sağdan ötmə” cəriməsi tətbiq edilə bilməz.

Bu, üstələmə adlanır. Bəziləri bunu “yandan keçmə” kimi ifadə edir. Əslində isə söhbət üstələmədən, yəni qabaqlamadan gedir. Təəssüf ki, hazırda yol hərəkəti qaydalarında bu termin ayrıca təsbit olunmayıb”, – deyə Aqil Rəhimov bildirib.

Mütəxəssis sürücüləri yol hərəkəti qaydalarına riayət etməyə və manevrlər zamanı diqqətli olmağa çağırıb.

Eltac Zülfüqaroğlu