Sumqayıt bulvarında avtomobillərin hərəkəti piyadalara təhlükə yaradır - FOTO

Sumqayıt şəhərində bulvar ərazisi ilə bağlı yayılan foto sosial şəbəkələrdə müzakirələrə səbəb olub.

Avtosfer.az xəbər verir ki, şəhərin simvolu olaraq bilinən “Göyərçin” heykəlindən sonrakı ərazidə şəhərsalma mövzusunda bir sıra nöqsanlar ortaya çıxıb. Belə ki, daha əvvəl gecə klubu kimi fəaliyyət göstərən obyektlər sonradan restoran şəbəkələrinə verilib. Lakin şəhərdə bulvar salınandan sonra həmin bulvarın ortasından avtomobillərin hərəkəti üçün də şərait yaradılıb. Bu isə piyadaları narahat edir.

Sakinlər bildirirlər ki, azyaşlı övladları ilə bulvara gəzməyə çıxan, eləcə də restoranlara getmək istəyənlər bu cür təhlükəli vəziyyətlə qarşılaşmalı olur. “Göyərçin” parkının pilləkənlərinin qarşısı da parklanan nəqliyyat vasitələri tərəfindən zəbt edilir. Həftə sonları bulvarı ziyarət edənlərin çoxluğu vəziyyəti daha da çətinləşdirir. Avtomobil idarə edən gənclər daha təhlükəli sürüşlər sərgiləyir, bəziləri hətta avtoxuliqanlıq da edirlər. Bu isə piyadaların həyatını təhlükəyə atır.

Sakinlər bu problemin aidiyyəti qurumlar tərəfindən nəzarətə götürülməsi və həllini tələb edir.

Səfər