Sürücülərin buraxdığı bu kiçik səhv ağır qəza ilə nəticələnə bilər – MÜTƏXƏSSİS – VİDEO

Yol hərəkəti zamanı sürücünün haqlı olması onu hər zaman qəzadan sığortalamır. Xüsusilə də dönmə manevrləri zamanı digər hərəkət iştirakçılarının qayda pozuntularını nəzərə almaq vacibdir.

Avtosfer.az xəbər verir ki, bu barədə qəza əleyhinə kursların məşqçisi Aqil Rəhimov sürücülərə müraciətində bildirib.

O, Bakıxanov küçəsi ilə keçmiş Fabritsius küçəsinin kəsişməsində qeydə alınan vəziyyəti nümunə göstərərək qeyd edib ki, bəzi sürücülər yol nişanları və nişanlanma xətlərinin tələblərinə əməl etmədikləri üçün təhlükəli vəziyyət yaradırlar.

Həmin ərazidə zolaqların hərəkət istiqamətləri aydın şəkildə müəyyən edilib. Belə ki, sol zolaqdan yalnız sola dönməyə icazə verilsə də, bəzi sürücülər qaydaları pozaraq həmin zolaqdan düz istiqamətdə hərəkəti davam etdirirlər. Bu isə digər sürücülər üçün gözlənilməz risk yaradır.

Məşqçi bildirib ki, məhz belə halların qarşısını almaq üçün sürücülər manevri tamamlamazdan əvvəl son dəfə güzgüləri yoxlamalıdırlar.

“Buna “son baxış” prinsipi deyilir. Sürücü özünün üstünlüyə malik olduğunu və ya hərəkət istiqamətinin düzgün olduğunu düşünsə belə, son anda güzgülərə nəzər salmalıdır. Çünki digər hərəkət iştirakçılarının qaydaları pozması ehtimalı hər zaman mövcuddur”, – deyə o vurğulayıb.

Aqil Rəhimov qeyd edib ki, son baxış vərdişi bir çox hallarda yol-nəqliyyat hadisələrinin qarşısını almağa kömək edir. Onun sözlərinə görə, sürücülər yalnız öz hərəkətlərinə deyil, ətrafdakı nəqliyyat vasitələrinin mümkün səhvlərinə qarşı da hazırlıqlı olmalıdırlar.

Müdafiəedici sürücülük prinsiplərinin tətbiqi, güzgülərdən düzgün istifadə və yol şəraitinin davamlı müşahidəsi qəzaların sayının azalmasına mühüm töhfə verə bilər. O, sürücüləri hərəkət zamanı diqqətli olmağa və yol hərəkəti qaydalarına ciddi əməl etməyə çağırıb.

Eltac Zülfüqaroğlu