Sürücülərin çoxu bu səhvi edir: İsti havada avtomobili necə düzgün soyutmaq olar?

Anomal isti hava şəraitində sürücülər avtomobildə kondisionerdən istifadə etməklə sərinləməyə çalışırlar. Lakin "Aktualne.cz" nəşrinin yazdığına görə, onların əksəriyyəti eyni səhvə yol verir.

Avtosfer.az xəbər verir ki, isti havalarda "çöldəki və salondakı temperatur fərqi 5 dərəcədən çox olmamalıdır" qaydasına əməl etmək demək olar ki, mümkün deyil. Çünki havanın temperaturu 40 dərəcəyə yaxın ola bilər və bir çox avtomobil salonu avtomatik iqlim nəzarəti sistemlərində təyin edilən yuxarı hədd – 29 dərəcədən aşağı soyuda bilmir.

Avtomobil uzun müddət günəş altında qalıbsa, yola çıxmazdan əvvəl salonun havalandırılması tövsiyə olunur. Bunun ən sadə yolu açarın kilidi açma düyməsini bir qədər basılı saxlamaqdır. Bu zaman pəncərələr avtomatik olaraq bir qədər açılır. Elektrikli avtomobil sahibləri isə mobil tətbiq vasitəsilə avtomobilə minməzdən əvvəl salonu uzaqdan soyuda bilərlər.

Ən vacib məsələ kondisionerin hansı temperatura tənzimlənməsidir. Həkim Daniela Vatsulikovanın sözlərinə görə, salonu qəfil soyutmaq olmaz. O, əvvəlcə temperaturu 29 dərəcəyə təyin etməyi, daha sonra isə tədricən bir neçə dərəcə aşağı salmağı məsləhət görür.

Həkim bildirir ki, belə isti havada kondisioneri dərhal 22 dərəcəyə keçirmək düzgün deyil. O özü də yay aylarında kondisioneri adətən istifadə etdiyindən 3–4 dərəcə daha yüksək temperaturda işlətməyə üstünlük verir.

Onun sözlərinə görə, kəskin temperatur fərqi soyuqdəymə riskini artırır. İsti küçədən avtomobilə minərək üzü birbaşa buz kimi soyuq hava axınına tutmaq xəstələnmə ehtimalını yüksəldir. Bundan əlavə, boyun nahiyəsində əzələ spazmları yarana, quru hava isə selikli qişanı qurudaraq onu infeksiyalara qarşı daha həssas edə bilər.

Bu səbəbdən soyuq hava axınını sərnişinlərin üzərinə deyil, yan şüşələr istiqamətinə yönəltmək tövsiyə edilir.

Mütəxəssislər daha bir faydalı məsləhət də verirlər: səfərin bitməsinə bir neçə dəqiqə qalmış kondisioneri söndürmək lazımdır. Bu, orqanizmin çöldəki temperatura tədricən uyğunlaşmasına kömək edir, eyni zamanda kondisioner sistemində yaranan kondensatın qurumasını təmin edir.

Boruların daxilində qalan rütubət bakteriya və kif üçün əlverişli mühit yaradır. Bu isə avtomobil salonunda xoşagəlməz qoxunun yaranmasına, həmçinin sağlamlıq problemlərinə səbəb ola bilər. Həkimin sözlərinə görə, bu vəziyyət allergiyası olan insanlarda burun axması yarada, astma xəstələri üçün isə əlavə risk təşkil edə bilər.

Qeyd olunur ki, 2000-ci illərin əvvəllərində kondisioner əsasən bahalı avtomobillərdə təklif olunan əlavə avadanlıq hesab olunurdu. Bu gün isə onsuz hətta büdcə sinfinə aid avtomobillər də nadir hallarda satışa çıxarılır.