Yanacaqdoldurma məntəqələrinin giriş-çıxışlarında piyada təhlükəsizliyi necə təmin olunmalıdır? – EKSPERT

Şəhər daxilində yerləşən yanacaqdoldurma məntəqələrinin giriş-çıxışları piyada təhlükəsizliyi baxımından xüsusi diqqət tələb edir.

Avtosfer.az xəbər verir ki, nəqliyyat eksperti Rauf Ağamirzəyev bildirib ki, bu ərazilərdə piyada və avtomobil hərəkətinin kəsişməsi qaçılmaz olduğundan, piyada infrastrukturunun düzgün təşkil olunması vacibdir.

Yanacaqdoldurma məntəqələrinin giriş-çıxışlarında piyada infrastrukturu fərqli örtük materialından istifadə edilməklə, səki səviyyəsindən aşağı salınmadan, mümkün qədər fasiləsiz və yüksəldilmiş formada təşkil edilə bilər.

Onun sözlərinə görə, belə həll piyadaya prioriteti həm vizual, həm də fiziki olaraq göstərir. Eyni zamanda, sürücünün giriş-çıxış zamanı sürəti azaltmasına və diqqətini artırmasına şərait yaradır, piyada keçidinin davamlılığını qoruyur.

Rauf Ağamirzəyev qeyd edib ki, bu yanaşma hərəkət məhdudiyyətli şəxslər üçün də səki marşrutunun fasiləsizliyinin təmin olunmasına imkan verir.

Burada əsas məqsəd avtomobilin piyadaya görə səkiyə uyğunlaşmasıdır, piyadanın isə avtomobil girişinə görə səki səviyyəsini dəyişməsi deyil.

“Şəhər küçəsində yanacaqdoldurma məntəqəsinin giriş-çıxışı da piyada şəbəkəsinin bir hissəsi kimi layihələndirilməlidir”, – deyə Rauf Ağamirzəyev bildirib.

Eltac Zülfüqaroğlu