Yeni sürücülər avtomobilə ən çox hansı zərəri verirlər? – Ustadan AÇIQLAMA

Yeni sürücülər avtomobili istifadə etməyə başladıqda təcrübəsizlik və naşılıq səbəbindən bəzi səhvlərə yol verirlər. Bu səhvlər avtomobilin müxtəlif hissələrinə ciddi zərər vurur və onun tez sıradan çıxmasına səbəb olur. Yanlış sürmə vərdişləri, texniki qaydalara əməl etməmək və düzgün yanacaq seçməmək avtomobilin ömrünü qısaldır, eləcə də əlavə xərclər yaradır. 

Bəs görəsən, yeni sürücülər avtomobilə ən çox hansı zərəri verirlər?

Mövzu ilə bağlı avtomobil ustası Dəniz Ağabəyli Avtosfer.az-a bildirib ki, avtomobili yeni alan sürücülər ilk növbədə əyləc qəliblərini daha tez sıradan çıxarırlar, çünki avtomobili iki ayaqla sürürlər:

“Sürətlər qutusu olan avtomobil yalnız sağ ayaqla sürülməlidir. Amma yeni sürücülərimiz həm sağ, həm sol ayaqla idarə etdiklərinə görə əyləc qəlibləri daha tez sıradan çıxır, sürətlər qutusunun yağı isə daha tez xarab olur. Belə deyək, yağ qaralır və vaxtından əvvəl dəyişdirilməlidir.
Benzinə də kifayət qədər diqqət yetirmirlər. Çox vaxt müşahidə edirik ki, yeni sürücülər səhv yanacaq istifadə edirlər. Bəzən benzin yerinə dizel vurulur, bu da avtomobilin işə düşməməsinə səbəb olur.

Avtomobilin yan güzgüləri və digər funksiyalarının idarə olunmasında da çətinlik çəkirlər. Xüsusilə yeni alınan Çin istehsalı avtomobillər buna misaldır. Yeni sürücülər hələ bu texnologiyalara tam uyğunlaşmayıblar və bundan dolayı problemlər yaşayırlar.

Çin istehsalı avtomobillərdə, məsələn, qapaq monitordan açılır, ön işıqlar da monitordan idarə olunur. Bu funksiyaları internetdən öyrənməyə çalışırlar. Təcrübəli sürücülər isə bu problemlərin nədən qaynaqlandığını yaxşı başa düşürlər”.

Eltac Zülfüqaroğlu