Yol vermək bəzi sürücüləri niyə qorxudur? – Mütəxəssisdən AÇIQLAMA - VİDEO

Yollarda sürücülərin bir-birinə yol verməsi mövzusu yenidən müzakirə olunub. Xüsusilə əsas yola çıxmağa çalışan avtomobillərlə bağlı davranış qaydaları sürücülər arasında tez-tez narazılıq yaradan məsələlərdən biri hesab edilir.

Avtosfer.az xəbər verir ki, bu barədə qəza əleyhinə kursların məşqçisi Aqil Rəhimov danışıb. O bildirib ki, əsas yolda hərəkət edən sürücülər bəzən ikinci dərəcəli yoldan çıxan avtomobillərə yol vermək istəsələr də, bir avtomobildən sonra bir neçə nəqliyyat vasitəsinin ardıcıl şəkildə yola daxil olması problemlər yaradır.

Ekspertin sözlərinə görə, bəzi təcrübəli sürücülər bu vəziyyətdə müəyyən üsullardan istifadə edirlər:

“Bir avtomobilə yol vermək mədəniyyət əlamətidir. Amma bəzi hallarda bir maşına yol verildikdən sonra arxadakı digər avtomobillər də ardıcıl şəkildə yola çıxmağa çalışır. Bu isə əsas yolda hərəkətin ritmini poza və qəza riski yarada bilər”.

Aqil Rəhimov qeyd edib ki, təcrübəli sürücülər bəzən yol verdikləri avtomobillə aradakı məsafəni minimum saxlayaraq digər nəqliyyat vasitələrinin araya daxil olmasının qarşısını almağa çalışırlar. Lakin o, bu üsulun yeni sürücülər üçün təhlükəli ola biləcəyini də vurğulayıb:

“Bu cür davranış diqqət və sürücülük təcrübəsi tələb edir. Təcrübəsiz sürücülər üçün risk yarada bilər. Ona görə də hər zaman təhlükəsizlik məsafəsinə və yol hərəkəti qaydalarına əməl olunmalıdır”.

Yol hərəkətində qarşılıqlı hörmət və səbir əsas amillərdəndir. Onun fikrincə, sürücülər həm digər hərəkət iştirakçılarına şərait yaratmalı, həm də qaydalardan sui-istifadəyə yol verməməlidirlər.

Eltac Zülfüqaroğlu