Yolun kənarı ilə piyada hərəkət edirsə, bu cür sürməyin – SÜRÜCÜLƏRƏ XƏBƏRDARLIQ – VİDEO

İnsanla maşın arasında qalmaq çox təhlükəli situasiyalardandır. Qəza əleyhinə kursların məşqçisi Aqil Rəhimov bu cür hallarda hər zaman dayanmağı və avtomobil tam keçdikdən sonra hərəkəti davam etdirməyi məsləhət görür.

Avtosfer.az xəbər verir ki, Aqil Rəhimov müşahidə etdiyi real vəziyyətdən misal gətirərək bildirib ki, belə anlarda sürücünün və piyadanın reaksiyasını proqnozlaşdırmaq çətindir və kiçik bir hərəkət qurbanın həyatına son verə bilər.

“Mən dayandım, getmədim. Yalnız maşın tam keçdikdən sonra yoluma davam etdim. Əgər mən maşınla qadın arasına girsəydimsə, qadın sol tərəfə meyil etsəydi və ya yolun üzərində qəfil hansısa lyuk çıxsa, sürücü avtomobili mənim üstünə sürə bilərdi və qaçmağa heç yer qalmayacaqdı. O anda təhlükəsizlik pəncərəsi olmayacaq; qadına vurmaqla qəzadan qaçmaq mümkün olmur,” deyə Aqil Rəhimov vurğulayıb.

Məşqçi əlavə edib ki, bu tip situasiyalarda piyadaların və sürücülərin təmkinli davranması həyati əhəmiyyət daşıyır: 

“Qəfil və məsuliyyətsiz manevrlər həm piyadanın, həm də avtomobilin zərərinə gətirib çıxara bilər. Aqil Rəhimov qeyd edib ki, yol təhlükəsizliyinin təmin olunmasında əsas amillərdən biri, situasiyanı düzgün qiymətləndirmədir: 

Əks tərəfin hərəkət trayektoriyasını, yol vəziyyətini və aradakı məhdud hərəkət sahəsini nəzərə almaq lazımdır. Belə vəziyyətlə qarşılaşdıqda əvvəlcə dayanmaq, heç bir tələsik manevr etməmək, avtomobillərin tam keçməsini gözləmək və yalnız yol təhlükəsiz olduqda hərəkətə davam etmək, ən doğru davranışdır”.

Məşqçi əlavə edib ki, sürücülər də piyadalara daha ehtiyatlı yanaşmalı, sürəti uyğun səviyyədə saxlamalı və gözlənilməz manevrlərə hazır olmalıdırlar.

Eltac Zülfüqaroğlu