Maşının qabağını qaldırıb "hoqqa" verən sürücünün "07"si 7-ci dəfə CƏRİMƏ MEYDANÇASINDA - VİDEO

Sumqayıtda qayda pozan sürücü qeydə aldığı görüntünü sosial şəbəkə hesabında paylaşıb.

Avtosfer.az xəbər verir ki, video "Yaşıldərə" yaşayış massivini birləşdirən tuneldə qeydə alınıb.

Sürücünün idarə etdiyi  77-GT-907 "VAZ21074" markalı avtomobilin ön farasına qırmızı işıq quraşdırılıb, digər farası isə nasaz vəziyyətdədir.

Həmçinin, sürücü konstruksiyaya müdaxilə edib, avtomobili arxa qeydiyyat nişanını çıxararaq idarə edib.

O, cümlədən asqı sisteminə qanunsuz müdaxilə edərək, avtomobilin arxasını və qabaq hissəsini yuxarı qaldıraraq qanunu pozub.

Avtosfer.az-ın əldə etdiyi məlumata görə, həmin sürücünün idarə etdiyi nəqliyyat vasitəsi 21 iyul tarixində konstruksiya dəyişikliklərinə görə yol polisi tərəfindən saxlanılıb və avtomobil cərimə meydançasına yerləşdirilib. Sürücü Bayramov Əli Ramin oğlu barəsində İnzibati Xətalar Məcəlləsinin 342.2.3-cü maddəsinə əsasən inzibati protokol tərtib olunub. Əli Bayramov bu il ərzində eyni inzibati xətaya görə 6 dəfə saxlanılıb və maşın cərimə meydançasına salınıb. Sürücü avtomobildə olan dəyişiklikləri aradan qaldırdıqdan sonra cərimə meydançasından buraxılıb. Lakin cərimə meydançasından çıxan kimi yenidən servisə gedərək avtomobildə eyni dəyişiklikləri edib. Budəfəki cərimə isə sürücünün 7-ci dəfə eyni qayda pozuntusunun nəticəsidir. Bu günə qədər konstruksiya dəyişiklikləri aradan qaldırılmadığı üçün avtomobil hələ də cərimə meydançasındadır.

DİN-in Mətbuat Xidmətindən bildirilib ki, qeyd edilən görüntülər bu ilin iyun ayında çəkilib. Avtomobilin sürücüsü 2003-cü il təvəllüdlü Ə.Bayramov Sumqayıt Şəhər Polis İdarəsinin Dövlət Yol Polisi Şöbəsinin əməkdaşları tərəfindən müəyyən olunaraq saxlanılıb. Barəsində inzibati protokol tərtib edilib.

Könül Rauf