Sumqayıt yolunda avtobus beton arakəsməyə çırpıldı: ölənlər və yaralananlar var - FOTO - VİDEO

Bakı-Sumqayıt avtomagistralında baş verən qəza ilə bağlı 10.12.2023-cü il tarixində saat 06:35 radələrindən başlayaraq Sumqayıt Tibb Mərkəzinin Təcili Yardım Xəstəxanasına 6 nəfər gətirilib (4-ü qadın cinsi, 2-si kişi cinsi olmaqla).

Sumqayıt Tibb Mərkəzi İctimaiyyətlə əlaqələr bölməsindən bildirib ki, qapalı kəllə-beyin travması alan 1963-cü il təvəllüdlü qadın həkimlərin səylərinə baxmayaraq, dünyasını dəyişib.

Digər xəsarət alanlar - 1961-ci il təvəllüdlü qadın qapalı kəllə-beyin travması, sol bud sümüyünün sınığı, şəxsiyyəti məlum olmayan qadın qapalı kəllə-beyin travması, sol baldırın sınığı, 1992-ci il təvəllüdlü kişi üzün yumşaq toxumasının əziyi, aşağı ətrafın travması diaqnozları ilə Reanimasiya şöbəsində müalicələrini davam etdirirlər. Vəziyyətləri ağırdır.

1987-ci il təvəllüdlü kişinin qapalı kəllə-beyin travması, sağ dirsək sümüyün sınığı diaqnozu ilə Travmatologiya şöbəsində müalicəsi davam etdirilir, vəziyyəti stabildir.

1975-ci il təvəllüdlü qadına isə təpə nahiyəsinin sıyrıntısı, dirsəyin və ayağın əziyi diaqnozu qoyulub. Ona zəruri tibbi xidmətlər göstərilib və ambulator müalicə üçün evə buraxılıb.

***

Sumqayıt Bakı yolunda baş verən ağır yol-nəqliyyat hadisəsi nəticəsində ölənlərin sayı artıb.

Qəza nəticəsində xəstəxanaya aparılan daha bir nəfər ölüb, beləliklə həlak olanların sayı 2-yə çatıb.

Ölən şəxsin 1963-cü il təvəllüdlü Allahverdiyeva Ayna Təru qızıdır.

***

Sumqayıtda ağır yol-nəqliyyat hadisəsi baş verib.

Avtosfer.az APA-ya istinadən bildirir ki, Bakı-Sumqayıt marşrutu ilə hərəkət edən "Frod Tranzit" markalı mikroavtobus beton arakəsməyə çırpılıb.

Hadisə zamanı bir nəfərin öldüyü bildirilir, 6 nəfər yaralanıb. Onlardan dördünün vəziyyəti ağırdır.

İlkin ehtimala görə, qəzaya sürücünün yuxulaması səbəb olub.

Faktla bağlı araşdırma aparılır.