“BakuBus”un avtobusu “Maserati” ilə toqquşdu - VİDEO

Bakının mərkəzində bahalı qəza baş verdi. Xətai rayonu ərazisində "BakuBus"a məxsus avtobus "Maserati" ilə toqquşub. Avtosfer.az anpress-ə istinadən xəbər verir ki, avtoqəza Afiyəddin Cəlilov və Ayaz İsmayılov küçələrinin kəsişməsində qeydə alınıb. Müəyyən edilib ki, 8 saylı xətt marşrutu üzrə hərəkət edən və “BakuBus” MMC-yə məxsus “İveko” markalı sərnişin avtobusu Afiyəddin Cəlilov küçəsindən Ayaz İsmayılov küçəsinə keçməklə Nobel prospektinə doğru hərəkət edirmiş. Bu zaman Afiyəddin Cəlilov küçəsilə Yusif Səfərov küçəsi istiqamətində hərəkətdə olan “Maserati” markalı minik maşını onunla toqquşub. 

Sərnişin avtobusu sola dönən zaman “Maserati” markalı avtomobili onu gözləməyib. Nəticədə toqquşma qaçılmaz olub. 

Yol qəzasında xəsarət alan olmasa da, avtomobillərə ziyan dəyib. 

Hadisə yerinə Bakı Şəhər Baş Dövlət Yol Polis İdarəsinin müfəttişləri cəlb olunub və müvafiq müayinələr aparılıb. Sonrakı araşdırmalar zamanı avtotexniki ekspertizaların təyin ediləcəyi də istisna deyil.