Yol terroru - 2 ölü, 5 yaralı

Dünən respublikada baş verən yol-nəqliyyat hadisələri zamanı 2 nəfər ölüb, 5 nəfər isə yaralanıb. Avtosfer.az DİN-in saytına istinadən xəbər verir ki, Qaradağ rayonunun Ələt qəsəbəsində saat 11:00 radələrində yol-nəqliyyat hadisəsi baş verib. Hadisəyə səbəb Qazax rayon sakini Elçin Mustafayevin idarə etdiyi “Ford Tranzit” markalı avtomobili aşırması olub. Nəticədə onun sərnişinlərindən Hacıqabul rayon sakini Nemət Eminov hadisə yerində ölüb, digər 2 sərnişini isə xəstəxanaya yerləşdirilib. Zaqatala rayonunun Qımır kənd sakini Şahid Ramazanov axşam saatlarında idarə etdiyi “VAZ-2107” markalı avtomobili yolun kənarındakı hasara vurub və nəticədə o, hadisə yerində ölüb. Başqa bir yol-nəqliyyat hadisəsi isə Gəncə şəhərində baş verib. Göygöl rayon sakini Gülnar Verdiyeva saat 16:00 radələrində şəhərin Nizami küçəsində yolu keçən zaman müəyyən edilməmiş avtomobillə vurulub. G.Verdiyevaya xəstəxanada ilkin tibbi yardım göstərildikdən sonra buraxılıb. Nizami (Gəncə) RPİ tərəfindən əməliyyat-axtarış tədbirləri aparılır.

Fidan