Biləcəridə yük maşını piyadalara yol verən “Prius”a çırpıldı - VİDEO

Paytaxtın Binəqədi rayonu, Biləcəri qəsəbəsində baş verən yol-nəqliyyat hadisəsi anbaan kameraya düşüb.

Avtosfer.az-ın məlumatına görə,qəza  avqustun 27-də saat 16:01 radələrində Natəvan küçəsində qeydə alınıb.

Kadrlardan göründüyü kimi, 88-BV-284 dövlət nömrə nişanlı “Ford Transit” markalı yük maşını qarşıda dayanmış “Toyota Prius” markalı avtomobilə çırpılıb. Belə ki, “Prius”un sürücüsü piyada keçidindən azyaşlı övladları ilə keçən piyadalara yol vermək üçün dayanıb. Bu zaman arxadan hərəkətdə olan “Ford”un sürücüsü ara məsafəsini düzgün seçməyərək önündəki avtomobillə toqquşub. Videoda hadisədən bir neçə saniyə əvvəl yük maşını sürücüsünün günəş şüalarının qarşısını almaq üçün avtomobilin günlüyünü açdığı görünür. Sürücünün bu hərəkətinin diqqətinin yayınmasına və nəticədə qəzanın baş verməsinə səbəb olduğu qeyd olunur.

Xoşbəxtlikdən, qəza nəticəsində xəsarət alan olmayıb. Hər iki nəqliyyat vasitəsinə maddi ziyan dəyib.

Xatırladaq ki, sükan arxasında olan sürücü diqqətini yayındıra biləcək hərəkətlərdən çəkinməlidir. Əks halda, belə diqqətsizlik yol-nəqliyyat hadisəsi ilə nəticələnə bilər.

Nərmin