Bakıda transformator yenə yandı - Sakinlər deyir ki, hər il yanır.. - VİDEO

Paytaxtın Binəqədi rayonu Məhəmməd Əmin Rəsulzadə qəsəbəsində yanğın hadisəsi qeydə alınıb.

Bununla bağlı sakinlərdən biri Avtosfer.az-a videomaterial göndərib. Hadisə avqustun 4-də saat 21:30 radələrində Zəngəzur küçəsində baş verib. Sakinin sözlərinə görə, yanğına səbəb ərazidə quraşdırılmış transformatorun anidən alışması olub. Belə ki, kiçik qığılcımla başlayan yanğın qısa müddətdə böyük əraziyə yayılıb, hətta yaşayış evinin həyətini bürüyüb. Yanğından bir müddət sonra sakinlər “Azərişıq” ASC-nin və Fövqəladə Hallar Nazirliyinin qaynar xəttinə zəng edərək məlumat veriblər. Hadisə yerinə FHN-nin Dövlət Yanğından Mühafizə Hissəsinin əməkdaşları cəlb olunub. Lakin alışmaqda olan transformatora su vurmaq təhlükəli olduğu üçün yanğının qarşısını almaq mümkün olmayıb. Şikayətçi, “Azərişığ”ın əməkdaşlarının yanğın söndükdən sonra əraziyə gələrək enerji paylayıcısını zərərsizləşdirdiklərini qeyd edib.

Sakinin iddiasına əsasən, sözügedən qəsəbədə yanğın tez-tez baş verir: “Belə hadisələr yay aylarında ən azı 2 dəfə qeydə alınır. Buna səbəb isə “Azərişıq” ASC-nin 100 ev üçün nəzərdə tutulmuş transformatoru 200 evə qoşmalarıdır. Sakinlər isti havalarda kondisionerdən istifadə etdiyi üçün həddindən artıq yüklənmələr olur və yanğınla nəticələnir”.

O, mövcud problemlə bağlı dəfələrlə “Azərişığ”a müraciət etdiklərini, ancaq şikayətlərinin cavabsız qaldığını qeyd edib.

Nərmin