Kafedə tanımadığı kişini bıçalayan şəxs azadlığa buraxılıb

Tanımadığı şəxslə mübahisə edərək onu bıçaqlamaqda təqsirləndirilən Rüstəm Qənbərlinin cinayət işi üzrə məhkəmə prosesi yekunlaşıb.

Avtosfer.az APA-ya istinadən xəbər verir ki, bu gün Bakı Ağır Cinayətlər Məhkəməsində hakim Rasim Sadıxovun sədrliyi ilə keçirilən prosesdə hökm oxunub.
Hökmə əsasən, təqsirləndirilən Rüstəm Qənbərliyə Cinayət Məcəlləsinin 70-ci maddəsini tətbiq edərək ona cəza kimi 3 il şərti olmaqla 2 il sınaq müddəti verilib.

Rüstəm Qənbərli məhkəmə zalından sərbəst buraxılıb.

Xatırladaq ki, dövlət ittihamçsı təqsirləndirilən şəxsin 5 il müddətində azadlıqdan məhrum etmə cəzasına məhkum edilməsini istəyib.

Qeyd edək ki, hadisə ötən ilin iyun ayında Xəzər rayonu, Buzovna qəsəbəsində yerləşən "111" adlı kafenin qarşısında baş verib. İttihama görə, Rüstəm Qənbərli kafedə yeyib-içdikdən sonra çölə çıxıb. Bu zaman kafenin qarşında bir neçə şəxs mübahisə edib. Onları ayırmağa çalışan R.Qənbərli cibində olan bıçaqla Qurbanov Aydın Adəm oğluna bir bıçaq zərbəsi vurub. Bundan sonra 2-ci polis bölməsinin əməkdaşları Rüstəm Qənbərlini şübhəli şəxs qismində saxlayıb və ona qarşı Xəzər RPİ-nin İstintaq Şöbəsində Cinayət Məcəlləsinin 126.1-ci maddəsi ilə cinayət işi başlanıb.