Lənkəranda Xəzərdə itkin düşən balıqçıların axtarışları davam etdirilir - YENİLƏNİB

Lənkəran rayonunun Siyavar kənd sakinlərinin axtarışları davam edir.

Bu barədə Fövqəladə Hallar Nazirliyinin (FHN) Mətbuat Xidmətindən məlumat verilib.

"13 yanvar 2025-ci il tarixində Lənkəran şəhəri, Siyavar kəndi yaxınlığında Xəzər dənizində iki balıqçının itkin düşməsi barədə Fövqəladə Hallar Nazirliyinin "112" qaynar telefon xəttinə daxil olmuş məlumat əsasında axtarışlar davam etdirilir.

Hazırda itkin düşdüyü ehtimal edilən vətəndaşlar - 1984-cü il təvəllüdlü Mahmud Əbdüləli oğlu İbayev və 1968-ci il təvəllüdlü Nazim Səməd oğlu Abbasovun axtarışları FHN-in Kiçikhəcmli Gəmilərə Nəzarət və Sularda Xilasetmə Dövlət Xidmətinin qüvvələri tərəfindən həyata keçirilir. Əlavə məlumat veriləcək", - deyə məlumatda bildirilir.

***

09:18

Lənkəran sakinləri itkin düşüb.

Avtosfer.az xəbər verir ki, rayonun Siyavar kənd sakinləri 41 yaşlı Mahmud  İbayev və 57 yaşlı Nazim Abbasov balıq tutmaq məqsədi ilə dünən səhər dənizə çıxıblar.

Daha sonra balıqçılarla əlaqə kəsilib. Sahil mühafizə hissəsinin əməkdaşları balıqçıların axtarışını həyata keçirir.

Qeyd edək ki, ərazidə qatı dumana görə balıqçıların qayığının  istiqamətini dəyişdiyi də ehtimal olunur.