Silahdan açılan atəşdən ölən hərbi qulluqçumuz akademiya məzunu olub

Ötən gün Kəlbəcərdə N saylı hərbi hissədə həlak olan Azərbaycan ordusunun hərbi qulluqçusu Camal Nizami oğlu Hüseynov Azərbaycan Respublikası Prezidenti yanında Dövlət İdarəçilik Akademiyasının məzunu olub.

Avtosfer.az-ın məlumatına görə, odlu silahdan açılmış atəş nəticəsində həyatını itirən 2001-ci il təvəllüdlü C.Hüseynov Bakı şəhəri Səbail rayonunda yerləşən 50 saylı orta məktəbdə təhsil alıb.

Camal Hüseynov qəbul imtahanında 573 balla Azərbaycan Respublikası Prezidenti yanında Dövlət İdarəçilik Akademiyasının "Dövlət və bələdiyyə idarəetməsi" ixtisasına qəbul olub. Daha sonra Azərbaycan Dövlət İqtisad Universitetində magistr təhsili alıb. Təhsil aldığı illərdə məşhur marketlər şəbəkəsindən birində çalışıb.

Qeyd edək ki, hadisə ilə bağlı Kəlbəcər Hərbi Prokurorluğunda Cinayət Məcəlləsinin müvafiq maddəsi ilə cinayət işi başlanılıb.