Yol tikintisində 31 min manatlıq dələduzluq - Yaxud 3,3 milyonluq qazanca aldananlar

Bakı-İsmayıllı-Muğanlı-Qəbələ yolunun tikintisindən istifadə edərək dələduzluq əməli törətməkdə təqsirləndirilən şəxsə hökm oxunub. 

Avtosfer.az-ın "Qaynarinfo"ya istinadən məlumatına görə, Suraxanı Rayon Məhkəməsində Cinayət Məcəlləsinin 178.2.4-cü maddəsi ilə mühakimə olunan Qurban adlı şəxsə 2  il 11 ay 28 gün müddətinə azadlığın məhdudlaşdırılması cəzası təyin edilib.

İş materiallarından məlum olur ki, Qurban şirkət rəhbəri olub. Şirkəti tikinti sahəsində fəaliyyə göstərib. Bakı-İsmayıllı-Muğanlı-Qəbələ yolunun tikintisi gündəmə gələrkən Qurban Akif adlı şəxsə həmin layihədə iş təşkil edə biləcəyini bildirib. O, podratçı şirkət olan "Evrascon” ASC ilə müqavilə bağlanacağı, qazma və daşıma işləri aparılacağını deyib. 

Qurbanın sözlərinə görə, işlər 1,5 milyon kub metrlik ərazidə aparılacaq. Hər kub metr üçün 2,2 manat ödəniləcək ki, bu da bütövlükdə işə görə qazancın 3 300 000 manat olması deməkdir. 

Akif təbii ki, bu gəlirli iş təklifi ilə razılaşıb. Lakin Qurban işi düzəltmək üçün ondan 35 000 manat pul istəyib. Akifin o qədər pulu olmadığına görə, tanışları Elşən və Həsəni də prosesə cəlb edib. Beləliklə, Qurbana 31 500 manat pul verilib. Lakin Akif və tanışları ərazidə çıxarkən məlum olub ki, onlar aldadılıb. 

Qurbandan pullarını tələb etsələr də, o müxtəlif bəhanələrlə aldığı məbləği geri qaytarmayıb. Bundan sonra zərərçəkmişlər hüquq-mühafizə orqanlarına müraciət edib.