Azərbaycan Türkiyədən BARKAN yerüstü döyüş robotunun alınması ilə bağlı razılıq əldə edib

Azərbaycan və Türkiyə arasında BARKAN yerüstü döyüş robotunun alınması ilə bağlı ilkin razılıq əldə olunub.

Bu barədə “Report”un yerli bürosuna Türkiyənin HAVELSAN şirkətinin layihə müdiri Veysel Ataoğlu məlumat verib.

Onun sözlərinə görə, İstanbulda keçirilən “SAHA EXPO 2022” müdafiə, aerokosmik və kosmik sənayesi sərgisi çərçivəsində bununla bağlı iki ölkə arasında danışıqlar aparılıb:

“Yaxın vaxtlarda BARKAN yerüstü döyüş robotu Azərbaycanın Silahlı Qüvvələrinin arsenalına daxil ediləcək”.

Qeyd edək ki, Türkiyənin HAVELSAN şirkəti tərəfindən istehsal edilən və ümumi ağırlığı 380 kq olan BARKAN yüklərin daşınması və ya yedəklənməsi, yaxından mühafizənin təmin edilməsi, silahlı kəşfiyyatdan mina və partlamamış hərbi sursatların zərərsizləşdirilməsinə qədər müxtəlif vəzifələri yerinə yetirmək qabiliyyətinə malikdir. Bu ilin mart-aprel aylarında ilk nümunəsi istehsal olunan BARKAN Türkiyə Silahlı Qüvvələri tərəfindən uğurla sınaqdan keçirilib.

Xatırladaq ki, oktyabrın 25-də İstanbul şəhərində 876 şirkət və 24 universitetin iştirakı ilə “SAHA EXPO 2022” müdafiə, aerokosmik və kosmik sənaye sərgisi öz işinə başlayıb. Azərbaycanın qonaq qismində milli stendi ilə qatıldığı tədbirdə ölkəni müdafiə naziri general-polkovnik Zakir Həsənov və müdafiə sənayesi naziri Mədət Quliyevin rəhbərliyi altında nümayəndə heyəti təmsil edir.