Biləsuvarın Zəhmətabad kəndinin yolları bərbad vəziyyətdədir.

Bu barədə Report-a kənd sakinləri deyiblər.

Sakinlər bildiriblər ki, yolların bu vəziyyətdə olması onları narahat edir: "Qışda palçıqdan, yayda da tozdan bu yollarda hərəkət etmək olmur. Uşaqlar məktəbə gedib-gələndə əziyyət çəkirlər. Yağış yağanda bu yolda gərək uzunboğaz çəkmə ilə hərəkət edəsən. Xahiş edirik ki, bu yola asfalt çəkilsin".

Məsələ ilə bağlı kənd bələdiyyəsinə müraciət etdik. Bələdiyyədən bildirilib ki, yola dəfələrlə çınqıl tökülüb: "Lakin əsaslı təmir aparılmadığı üçün problem hələ də qalır. Sakinlər vergiləri ödəsələr, büdcə formalaşacaq və bu problem həllini tapacaq".