Cəzaçəkmə müəssisələrinə narkotik keçirilməsinin qarşısı alınıb

Penitensiar xidmətin əməliyyat aparatının həyata keçirdiyi əməliyyat-axtarış tədbirləri nəticəsində Bakı İstintaq təcridxanasına, 3 saylı İstintaq təcridxanasına, 11 saylı cəzaçəkmə müəssisəsinə və 16 saylı cəzaçəkmə müəssisəsinə narkotik və psixotrop maddələrin keçirilməsi cəhdlərinin qarşısı alınıb.

Xidmətdən APA-ya verilən məlumata görə, Cinayət Məcəlləsinin 126.1-ci maddəsinə əsasən təqsirli bilinərək həbs edilmiş və hal-hazırda Bakı İstintaq təcridxanasında saxlanılan Əsədov Anar Zöhrab oğluna həyat yoldaşı Bakı şəhər sakini Əsədova Elnarə Tofiq qızı tərəfindən gətirilən sovqata baxış keçirilən zaman orada olan cins şalvarın tikiş hissəsində xüsusi üsulla gizlədilən sellofan bükülüdə ümumi çəkisi 0,463 qram olan narkotik maddə - heroin aşkar edilib.

Cinayət Məcəlləsinin 177.2.2; 177.2.3; 177.2.4-cü maddələrinə əsasən təqsirli bilinərək həbs edilmiş və hal-hazırda 3 saylı İstintaq təcridxanasında saxlanılan Əliyev Anar Firidun oğluna isə qohumu Lənkəran rayon sakini Əlizadə Xeyrulla Qüdrət oğlu tərəfindən gətirilən sovqata baxış keçirilən zaman orada olan qış gödəkçəsinin astar hissəsində xüsusi üsulla tikilərək gizlədilən sellofan bükülülərdə ümumi çəkisi 2,033 qram olan narkotik maddə - heroin və ümumi çəkisi 0,048 qram olan psuxitrop maddə - metamfetamin olduğu müəyyənləşib.

Həmçinin Cinayət Məcəlləsinin 234.4.1; 234.4.3; 235.4.2 və 66.3-cü maddələrinə əsasən təqsirli bilinərək 9 il müddətinə azadlıqdan məhrum edilmiş və hal-hazırda 11 saylı cəzaçəkmə müəssisəsində saxlanılan məhkum İsmayılov Elgün Mürşüd oğluna qohumu Məmmədov Sahib Cəbrayıl oğlu tərəfindən gətirilən sovqata baxış keçirilən zaman orada olan alt paltarının bel hissəsindəki rezinə xüsusi üsulla hopdurularaq gizlədilən və ümumi çəkisi 3,348 qram olan narkotik maddə - heroin olduğu müəyyən edilib.

Bundan başqa, Cinayət Məcəlləsinin 228.1-c1 maddəsinə əsasən təqsirli bilinərək 1 il 9 ay müddətinə azadlıqdan məhrum edilmiş və hal-hazırda 16 saylı cəzaçəkmə müəssisəsində saxlanılan məhkum Əhmədov Rafiq Tofiq oğluna bibisi oğlu Bakı şəhər sakini Əhmədov Fariz Əbülfət oğlu tərəfindən gətirilmiş sovqata baxış keçirilən zaman orada olan gödəkçənin astar hissəsində xüsusi üsulla tikilərək gizlədilən sellofan bükülüdə ümumi çəkisi 0157 qram olan narkotik maddə - heroin olduğu aşkarlanıb.

Hər bir faktla bağlı araşdırma aparılır.