"Qazi" adından istifadə edərək avtomobili nömrəsiz idarə edən sürücü - VİDEO

Paytaxtın Bakıxanov prospektində avtomobili qeydiyyat nömrəsi olmadan idarə edən sürücü aşkarlanıb. Avtosfer.az xəbər verir ki, “AzSamand” markalı avtomobilin sürücüsü yol hərəkəti haqqında qaydaları kobud şəkildə pozub. Görünür qayda pozuntusundan yayınmaq məqsədilə avtomobilin arxa şüşəsinə “Qazi” sözünü yazıb. Lakin sürücü nəzərə almalıdır ki, qanun hər kəs üçün qanundur. 
Baxmayaraq ki, istər Dövlət Yol Polisi tərəfindən, istərsə də “Azərbaycan Qarabağ Müharibəsi Əlilləri, Veteranları və Şəhid Ailələri” İctimai Birliyi tərəfindən bu cür qayda pozuntusuna yol verən sürücülərə dəfələrlə xəbərdarlıq edilib, saxlanılıb və nəqliyyat vasitələrinin dövlət nömrə nişanı olmadan idarə edilməsinə qanunvericiliyin normalarında icazə verilmədiyi bildirilsə də təəssüflər olsun ki, bu kimi hallara mütəmadi olaraq rast gəlinir.
Nəqliyyat vasitəsi dövlət qeydiyyatına alınırsa, onların hər birinə dövlət qeydiyyat nişanları təhkim olunur. Sadəcə olaraq bəzi sürücülər inzibati məsuliyyətdən yayınmaq məqsədilə avtomobilin dövlət nömrə nişanlarını çıxarırlar.
Qeyd edək ki, İnzibati Xətalar Məcəlləsinin 342.7-ci maddəsində dövlət qeydiyyat nişanları və ya onlardan birinin olmamasına, saxta və ya mövcud standartlara uyğun olmayan və ya başqa nəqliyyat vasitələrinə verilmiş dövlət qeydiyyat nişanları ilə nəqliyyat vasitələrini idarə etməsinə görə cərimə məbləği 60 manat, cərimə balı isə 4 bal olaraq təyin olunub.

Nərminə Əli