Sükan arxasında yatdı, ağır qəza törətdi: 3 ölü, 16 yaralı - FOTO

Rusiyanın Surqut şəhərində iki nəqliyyat vasitəsinin iştirakı ilə ağır yol qəzası baş verib. Avtosfer.az yerli KİV-ə istinadən xəbər verir ki, hadisə martın 24-də Surqut-Koqalım yolunun 92-ci kilometrliyində qeydə alınıb.

Məlumata görə, hərəkətdə olan “Chevrolet Niva” markalı avtomobil sürücünün sükan idarəetməsini itirməsi səbəbindən yolun əks istiqamətinə çıxıb və qarşıdan gələn şəhərlərarası reys mikroavtobusu ilə toqquşub. Zərbənin təsirindən hər iki maşının ön hissəsi deformasiyaya uğrayıb.

Qəza nəticəsində “Niva”da olan biri 8 yaşlı uşaq olmaqla 3 nəfər hadisə yerində ölüb.

Avtobusda olan 16 yaralıya isə hadisə yerinə çağırılan Təcili Tibbi Yardım briqadasının əməkdaşları tərəfindən ilkin tibbi yardım göstərilib və xəstəxanalara aparılıb.

Bildirilir ki, hadisə “Chevrolet Niva” sürücüsünün sükan arxasında yatması səbəbindən baş verib.

Namiq Musayev