ADY İT akademiyası yaradacaq

"Azərbaycan Dəmir Yolları" QSC (ADY) İT akademiyası yaratmağı planlaşdırır.

Avtosfer.az Asiya İnkişaf Bankına (ADB) istinadən xəbər verir ki, bu, Azərbaycana bu yaxınlarda ayrılan texniki yardımın gözlənilən nəticələrində öz əksini tapıb.

Bu təşəbbüs çərçivəsində ADY-nin İT akademiyası tərəfindən idarə olunacaq "Korporativ universitet" adlı platformanın yaradılması planlaşdırılır. Bu platforma bilik mübadiləsi üçün alət rolunu oynayacaq: əməkdaşlar təlim, konfrans və seminarlarda əldə etdikləri məlumatları sənədləşdirə və yaya biləcəklər.

Texniki yardım Azərbaycanda dəmir yolu nəqliyyatının iqtisadi dayanıqlı inkişafının təmin edilməsi ilə bağlı strateji məqsədə uyğundur.

Dəmir yolu sektorunun rəqəmsallaşdırılması üçün potensial və bacarıqların inkişafı layihənin əsas nəticəsi olacaq. ADY əməkdaşlarının rəqəmsal səriştələrinin artırılması, rəqəmsal transformasiya şəraitində işləmək üçün davamlı kadr hazırlığı sisteminin yaradılması, həmçinin İT sektorunda gender fərqinin azaldılması nəzərdə tutulur.

Bununla əlaqədar olaraq ADY-nin bir sıra departament və funksional bölmələri üçün bacarıqlara olan tələbatın gender yönümlü həssas qiymətləndirilməsi aparılacaq. Təhlil həm İT sahəsində, həm də digər peşəkar bacarıqları əhatə edəcək, həmçinin şirkətin rəqəmsal texnologiyalar sahəsində gələcək ehtiyaclarını müəyyən edəcək.

Bundan əlavə, gender aspektlərinin də nəzərə alındığı rəqəmsal bacarıqların inkişafı üzrə pilot proqramlar hazırlanacaq və həyata keçiriləcək. Bu proqramlara "davamlı təcrübə modeli" (ADY-nin təcrübəçiləri üçün mentorluq proqramı) və İT departamentinin yeni əməkdaşları üçün intensiv təlim kursları daxildir.

ADY əməkdaşlarının Avstriya, Koreya Respublikası, İspaniya və İsveçrəyə təlim səfərlərinin təşkili planlaşdırılır. Həmçinin Azərbaycanda təlimlərin keçirilməsi və ADY-nin tədbirlərində, nəqliyyat sektorunun rəqəmsallaşdırılması və inkişafı məsələləri üzrə dövlət forumlarında iştirak üçün xarici ölkələrin dəmir yolu şirkətlərindən beynəlxalq ekspertlər dəvət olunacaq.

Əldə edilmiş biliklər "Korporativ universitet" platforması vasitəsilə sistemləşdirilərək yayılacaq.

Qeyd olunur ki, ADY rəqəmsal transformasiya prosesindən keçir və təkcə 2024-cü ildə insan kapitalının inkişafına 1 milyon manat ayrılıb. Transformasiya çərçivəsində daxili kadr inkişafı sisteminin yaradılmasını, təhsil müəssisələri ilə əməkdaşlığı və beynəlxalq tərəfdaşlığı əhatə edən kadr potensialının artırılması proqramı hazırlanıb.

Xatırladaq ki, daha əvvəl ADB dəmir yolu sektorunda rəqəmsal bacarıqların inkişafı üçün Azərbaycan hökumətinə 500 min ABŞ dolları məbləğində texniki yardımın ayrılmasını təsdiqləyib.