Bakıda 389 taksi sürücüsü cəzalandırıldı – Qayda pozanlara qarşı mübarizə SƏRTLƏŞDİ

Aprel-may aylarında taksi daşımasında qayda pozuntularına qarşı ciddi tədbirlər görülüb. Avtosfer.az-ın əldə etdiyi məlumata görə, Azərbaycan Yerüstü Nəqliyyat Agentliyi (AYNA) tərəfindən aprel və may aylarında taksi minik avtomobilləri ilə daşımalarda sərnişindaşıma qaydalarına və sərnişin-sürücü münasibətlərində sürücülər tərəfindən edilmiş qayda pozuntularına görə ciddi nəzarət tədbirləri həyata keçirilib.
Nəticədə 389 nəqliyyat vasitəsinin fəaliyyəti, eləcə də həmin avtomobillərin sürücülərinə sifarişlərin ötürülməsi dayandırılıb. Qeyd olunan saydan 182 nəqliyyat vasitəsinə verilmiş buraxılış kartları (icazələr) ləğv edilib.
Bu tədbirlər sərnişinlərin təhlükəsizliyinin təmin olunması, xidmət keyfiyyətinin yüksəldilməsi və bu sahədə nizam-intizamın gücləndirilməsi məqsədilə həyata keçirilir. Belə ki, müxtəlif mənbələrdən, o cümlədən sərnişinlərin 141 qaynar xətt vasitisilə, eləcə də sosial şəbəkələrdən və müxtəlif media resurslarından ünvanladığı şikayətlər araşdırılıb. Həmin şikayətlərin bir çoxu öz təsdiqini tapıb və nəticədə AYNA tərəfindən ciddi tədbirlər görülüb.
Qeyd edək ki, taksi fəaliyyətində təkmilləşdirmə işləri davam etdirilir, qanunvericiliyə edilmiş dəyişikliklərin və yeniliklərin tətbiqinə nəzarət daha da gücləndirilib. Bundan əvvəl isə AYNA hüquqi və fiziki şəxslərə dəfələrlə müraciət edərək görüşlər keçirib və qanunvericiliyin tələblərini izah edib.

Emin