İkinci əl avtomobil alanların DİQQƏTİNƏ: Bunları BİLMƏLİSİNİZ

İkinci əl avtomobil almaq böyük maliyyə qənaəti təmin etsə də, diqqətsizlik edildikdə ciddi gözlənilməz xərclərə və hüquqi problemlərə yol aça bilər. 

İşlənmiş maşın bazarında uğurlu seçim etmək üçün tələsmədən, addım-addım və hərtərəfli yoxlama aparmaq həyati əhəmiyyət kəsb edir.

Bəs ikinci əl avtomobil alarkən əsas nələrə diqqət etməliyik? Hit.az bu suala cavab axtartıb...

İlk növbədə avtomobilin kuzovunun (kuzov detalının) vəziyyəti diqqətlə nəzərdən keçirilməlidir, çünki ciddi vuruğu olan maşının geometriyasını bərpa etmək demək olar ki, imkansızdır. Detalların aralarındakı məsafələrə, boyanın rəng tonu fərqlərinə və xüsusilə sütunlardakı qaynaq izlərinə fikir vermək avtomobilin ağır qəza keçirib-keçirmədiyini üzə çıxarır. Mütləq xüsusi boyaölçən cihazla kuzovun hər bir detalını yoxlamaq və spaklyovka qatının olub-olmadığını dəqiqləşdirmək lazımdır.

Mühərrik xanasına baxarkən yağ sızmalarının, paslanma izlərinin və ya təmizlənməmiş çirk qatlarının olub-olmaması araşdırılmalıdır. Mühərriki soyuq halda işə salaraq çıxan tüstünün rənginə diqqət etmək vacibdir; göy tüstü yağ yeməni, ağ tüstü isə silindr qapağının aralıq qatının (prokladka) yandığını göstərir. İşləyən mühərrikdən kənar taqqıltı, kəskin vibrasiya və ya metal sürtünmə seslərinin gəlməməsi aqreqatın sağlamlığından xəbər verir.

Sürətlər qutusunun (karobkanın) vəziyyətini yoxlamaq üçün avtomobili müxtəlif rejimdə test yürüşünə çıxarmaq mütləqdir. Ötürmələr dəyişərkən gələn gecikmələr, vurmalar və ya silkələnmələr bahalı transmissiya təmirinin yaxınlaşdığını göstərən əsas siqnallardır. Avtomobilin asqı sistemini (xodovoy) yoxlamaq üçün kələ-kötür yolda tormozlama və manevrlər edərək amortizatorlardan və rullardan kənar səslərin gəlmədiyinə əmin olmaq lazımdır.

Spidometrdəki yürüş göstəricisinə (probeqə) kor-koranə inanmaq olmaz, çünki ikinci əl bazarında yürüşün geriyə çəkilməsi hallarına tez-tez rast gəlinir. Avtomobilin ümumi köhnəlmə dərəcəsini sükanın, pedalların, ötürücü rıçaqının və oturacaqların dərisinin yeyilmə səviyyəsinə görə təyin etmək mümkündür. İdarəetmə panelində hava yastığı xəbərdarlıq işığının yanması və ya təhlükəsizlik kəmərlərinin kəskin bloklanması qəza zamanı hava yastıqlarının açıldığından xəbər verə bilər.

Avtomobilin bütün elektronika sistemini - kondisioneri, şüşəqaldıranları, audio sistemi və işıq cihazlarını tək-tək işlədib yoxlamaq lazımdır. Kompüter diaqnostikası vasitəsilə mərkəzi beyində saxlanılan gizli xətaları və pozuntuları oxutdurmaq vacib texniki addımdır. Alqı-satqıdan əvvəl maşını mütləq özünüzün etibar etdiyiniz bitərəf usta və ya rəsmi servis mərkəzinə göstərməlisiniz.

Hüquqi tərəfdən isə avtomobilin üzərində həbs, bank girovu və ya ödənilməmiş külli miqdarda cərimələrin olub-olmadığını Dövlət Yol Polisinin bazası vasitəsilə yoxlamaq lazımdır. Avtomobilin şassi (VIN) kodunu mühərrik xanasında və sənədlərdə tutuşduraraq saxtakarlıq riskini aradan qaldırmalısınız. Razılaşma əldə olunduqdan sonra ödənişi tam rəsmiləşdirmədən əvvəl alqı-satqını mütləq Dövlət Yol Polisi İdarəsində mülkiyyət hüququnun tam keçirilməsi (ada keçirmə) ilə yekunlaşdırmalısınız.